36. De beata Maria V.

I.

1. Ave, virgo gloriosa,
Paradisi vernans rosa,
Super omnes speciosa,
Dei genetrix Maria.

2. Ave, mundi dominatrix,
Peccatorum liberatrix,
Nobis sis auxiliatrix
Et semper propitiatrix,
Dei genetrix Maria.

3. Ave, consurgens aurora,
Fulgens et aurea hora,
Virgo dulcis et decora,
Pro nobis miseris ora;
Ora semper, semper ora,
Ora regem et implora,
Ut nos ducat sine mora
Ad regna sereniore,
Dei genetrix Maria.

4. Ave, virgo veneranda,
Dulcis semper et amanda,
Prae omnibus collaudanda,
Inter omnes admiranda,
Super omnes exaltanda,
Dei genetrix Maria.

5. Ave, fulgens et praeclara,
Ave, sponsa Dei cara,
Ave, dulcis et benigna,
Ave, super omnes digna,
Dei genetrix Maria.

G. Ave, lucens in praeclaris,
Quae lux Dei appellaris,
Ave, virgo singularis,
Duc nos, ubi delectaris
Sine fine et laetaris,
Dei genetrix Maria.

7. Ave, lumen scientiae,
Lumen intellegentiae,
Decor prudentiae,
Via iustitiae,

Spes salutis, fons veniae,
Mater misericordiae,
Dei genetrix Maria.

8. Ave, lumen veritatis
Et supernae claritatis,
Ave, fons benignitatis
Et immensae bonitatis,
Ave, templum sanctitatis
Et verae humilitatis,
Dei genetrix Maria.

9. Ave, gemma puritatis
Et summae integritatis,
Ave, rosa caritatis
Et lilium castitatis,
Ave, flos virginitatis,
Singularis dignitatis,
Ave, mater pietatis,
Dei genetrix Maria.

10. Ave, fons veri laminis,
Verae beatitudinis,
Vas aureum, vas floridum,
Vas mirae pulchritudinis,
Vas spiritalis gratiae,
Vas caelestis dulcedinis,
Tu regis magni nominis
Mater, tu salus hominis,
Dei genetrix Maria.

11. Ave, templum Salomonis,
Ave, vas electionis,
Vas pulchrae dilectionis,
Lux supernae visionis,
Tu supernis gaudes donis,
Nulla tibi par in thronis,
Dei genetrix Maria.

II.

1. Salve, Dei mater pia,
Salve, virgo, lucis via,
Salve, templum sanctum Dei,
Salve, lumen nostrae spei,
Fulgens aurora diei,
Virga Dei, placens ei,
Miserere huius rei,
Memor esto semper mei,
Dei genetrix Maria.

2. Salve, prae cunctis praelata,
Deoque praedestinata,
A regibus exspectata,
Et diu desiderata,
A patriarchis optata,
A prophetis praedicata
Et mundo praenuntiata,
Salve, feliciter nata,
Mirabiliter creata,
Piis moribus ornata,
Virtutibus decorata,
Prae omnibus Deo grata,
Dei genetrix Maria.

3. Salve, lux candidissima,
Lux caeli serenissima,
Stella fulgens clarissima,
Stellarum splendidissima,

Margarita purissima,
Lux intima,
Dulcedo suavissima,
Dei genetrix Maria.

4. Salve, virgo piissima,
Salve, dulcissima,
Salve, sanctissima,
Salve, Deo carissima,
Salve, beatissima,
Omni laude dignissima,
Dei genetrix Maria.

5. Salve, nive candidior,
Lacte mundior,
Auro fulgentior,
Gemmis pretiosior,
Caelo purior,
Sole praeclarior,
Luna, stellis splendidior,
Dei genetrix Maria.

6. Salve, splendor mirabilis,
Virtus inenarrabilis,
Post Deum ineffabilis,
O virgo venerabilis,
Super omnes laudabilis,
Tu sis nobis placabilis,
Dei genetrix Maria.

7. Salve, regina caelorum,
Laus angelorum,
Gaudium supernorum,
Via iustorum,
Spes omnium electorum,
Dei genetrix Maria.

8. Salve, lumen fidelium,
Lumen humilium,
Lumen lucem quaerentium,
Lumen Deum timentium,
Lumen pium,

Dei genetrix Maria.

9. Salve, lux vera mentium,
Vera spes, verum praemium,
Vera pax, verum gaudium,
Vera salus credentium,
Dei genetrix Maria.

10. Salve, pium refugium,
Pietatis incendium,
Dulce remedium,
Caeleste desiderium,
Bonum consilium,
Verum Dei auxilium,
Veni in adiutorium,
Ora pro nobis filium,
Dei genetrix Maria,

11. Salve, dulce consolamen,
Nostrum tolle desolamen,
Salve, caeli relevamen,
Aufer a corde velamen,
Salve, pium inspiramen
Caelesteque medicamen,
Sana me, tolle gravamen,
Sentiant tuum levamen,
Qui tuum quaerunt invocamen,
Ad verum Dei solamen
Per te veniamus. Amen.

III.

1. Gaude, salus nobis data,
Ab angelo salutata,
Salutando obumbrata,
O vere sanctificata,
O vere illuminata,
O vere glorificata,
Mater Dei es vocata
Et virgo immaculata;
O virgo intemerata,
Tu nostra es advocata,
Tu piis es declarata,
Dei genetrix Maria.

2. Gaude, prae cunctis laudata,
Inter omnes admirata,
Super omnes exaltata,

Super sanctos elevata,
Super choros coronata,
Super thronos sublimata,
Dei genetrix Maria.

3. Gaude, prae cunctis dilecta,
Gaude, via caeli recta,
Electa et praeelecta
Et super omnes electa,
Dei genetrix Maria.

4. Gaude, sponsa Dei electa,
Esto nobis via recta,
Ad aeterna gaudia,
Ubi pax est et gloria,
Et nos semper aure pia
Dulcis exaudi Maria.