143. Oratio ad beatam Mariam V.

1. Salve, regina omnium,
Virgo mater, post filiam,
Salve, caelestis ianua
Errantibus tu patula.

2. Salve, tu Dei genetrix,
Invocantum te adiutrix,
Tuo processit utero
Tamquam sponsus de thalamo

3. Qui nos venit redimere,
Mundum dignatus visere.
Et quia moles criminum
Me nimis fecit miserum,

4. Ad te solam confugio,
Tuum solamen flagito,
Pande mihi dulcissimum
Pietatis sacrarium.

5. Pateant aures tuae piae
Votis meae angustiae,
Appella pro me filium,
Filium Deique tuum,

6. Ut mihi sit propitius,

Qui te quaero prae omnibus.
Sed, tu quod non vis, diligo,
Castitatem, heu, fugito.

7. Periurus, mendax, invidus,
Illicitorum cupidus,
Ira fremens et odio
Et semper studens otio,

8. Quid dicam ante iudicem
Caelis, terris terribilem,
Qui statuet iudicium
Et iudicabit saeculum?

9. Sed tu, o Dei genetrix,
Virgo es ineffabilis,
Te spem meam constituo,
Me tibi servum offero.

10. Fide tua me suscipe,
Nato tuo restitue,
Mea peccatrix anima
Ne sit in fine perdita.

11. Praesta mihi subsidium,
Dum hoc relinquo saeculum,
Et cum recedit spiritus,
Castis adesto precibus.

12. Nam te orante, domina,
Sanctorum surgunt milia,
Si tu sola silueris,
Vox nulla erit ceteris.

13. Noli silere, domina,
Esto mihi propitia,
Non enim vult me perdere,
Qui me redemit sanguine.

14. Me cunctis locis protege,
Labentem semper erige,
Manum sacratam porrige,
In viam pacis dirige.

15. Vales enim prae omnibus,
Quos praecellis virtutibus,
Tu angelorum domina,
Tu prophetarum gloria,

16. Apostolorum, martyrum,
Confessorum ac virginum
Nec non sanctorum omnium,
Solve meam miseriam.

17. Tu mihi da clementiam,
Ut vocem Christi audiam,
Per quam vitam possideam
Et te laudare valeam.