94. Oratio ad beatam Mariam V.

1. Mater Domini Maria,
Recta paradisi via,
De qua dicit prophetia
Quae fuit in Isaia:

2. Virgo germinabit florem,
Qui septenum fert odorem,
Virgo paritura prolem
Generabit salvatorem.

3. Per te genitus est Deus,
Tuus dominus et meus,
Sicut resonat Matthaeus,
Licet deneget Iudaeus.

4. O tu virgo singularis,
Aula Christi, stella maris,
Quae theotocon vocaris,
Mihi iam compatiaris.

5. Ego namque pro peccatis
Nimium inveteratis,
Multis et non computatis
Mihi pertimesco satis.

6. Vulnera sunt veterana,
Quibus medicina vana
Exstat funditus humana,
Sana me tu, virgo sana.

7. O Maria benedicta,
Mea dilue delicta,
Ne sententia districta
Christi mihi sit vindicta.

8. Aures tuas, o regina,
Meis precibus inclina,
Ut caelestis medicina
Per te mihi sit vicina.

9. In me generatur fletus,
Stringit dolor, terret metus,
Iam non possum fore laetus,
Qui peccatis sum repletus.

10. Astra caeli non sunt tanta,
In me vitia sunt quanta,
Quae tu, virgo, mater sancta,
Almis precibus supplanta.

11.O si dares nunc auditus,
Ut me traheres ad litus,
Quem demergit maris situs,
Quo teneor irretitus.

12. Fundunt lacrimas pupillae,
Quas suscipiunt maxillae,
Comparatus sum favillae,
In me vitia sunt mille.

13. Unde te, dilecta Deo,
Recolens in corde meo
Multum rogitando fleo,
Ut sis pia mihi reo.

14. Emendare me sum praesto,
Nunc placere Deo gesto,
Sed tu, virgo, mihi maesto
Iam placabilis adesto.

15. Nobilis et mente pura,
Cum sis mitis ex natura,
Quare nunc es mihi dura
Nulla permanente cura?

16. Audi, porta paradisi,

Per quam multi sunt confisi,
Ego, cum peccavi, risi,
Modo fleo, quod commisi.

17. Ad te clamo de profundo,
Genu flecto, pectus tundo,
Et tu nunc, dilecta, mundo
Vento subveni secundo.

18. O columba sine felle,
Iam suspiria repelle,
Monstra te salvare velle
Meque manibus compelle.

19. Ego namque, cum peccavi,
Vidi vulnus et expavi,
Unde nunc maerore gravi
Tibi supplico suavi.

20. Et tu, virgo, praebe mentem,
Monstra fore te clementem,
Ut me nimium maerentem
Deum facias videntem.

21. Ego perpetravi faecem,
Rupi verba legis decem,
At tu, casta virgo, precem
Audi nunc et tolle necem.

22. Ante tuum, virgo, vultum
Fleo rogitando multum,
Ut, quod contra Dei cultum
Feci, mihi sit indultum.

23. Quodsi fuerit audita
Mea vox, convertar ita,
Ut sit Christus mihi vita
Saecula per infinita.