176. Oratio ad beatam Mariam V.

1. Vale, virgo, angelorum
Atque mundi domina,
Restauratrix infirmorum,
Sana mea vitia.
2. Me molestum, me lugentem,
Pia mater, respice,
Sana in te confidentem,
Mater indulgentiae.

3. Peccatorem paenitentem
Ne damnes pro crimine,
In te figo meam mentem,
Noli me relinquere.
4. Nunquam sinas me perire
Sine adiutorio,
Me digneris exaudire,
Quando te vocavero.

5. Et me tibi fac servire,
Hic quamdiu vixero,
Vitam meamque finire
In tuo servitio.

6. Me digneris expurgare
A faece peccaminum,
Credo, quod me condemnare
Non vis propter vitium.