54. Oratio ad beatam Mariam V.

Felix mater, ave, qua mundus solvitur a vae,
Quae genetricis Evae vae facis esse breve.
Salve, sancta parens, virgo mundi reparatrix,
Omni labe carens, clemens hominum miseratrix.
5. Salve, munditiae speculum, flos virginitatis,
Caelestis patriae splendor, templum deitatis.
Salve, flos florum, rosa primula, virgo suavis,
Spes peccatorum, fons vitae caelica clavis.
Sacra pincerna veniae, regina superna,

10. Solis lucerna, precibus nos, virgo, guberna.
Virgo Deo digna, virgo pia, [virgo] benigna,
Contra luctamen hostis mihi ferto iuvamen,
Ut sanctum flamen hic assit, funde precamen.
Sancta maris stella, felix fecunda puella,

15. Hanc cellam signa, propellens cuncta maligna.
Fac me sub cella sic omnia ferre flagella,
Ut vitiis purus teneam, quem sum petiturus,
Et cruce securus pergam sub ea moriturus,
Et cum decedam mundo, cum laude recedam,

20. Ne Belial praedam capiat de me sibi foedam,
Hoc praestet munus, qui regnat trinus et unus.