192. De beata Maria V.

1. Ymago, imitago
Mundissima altissimi,
Genetrix omnipotentis,

2 a. Natura dolens miratur
Atque ratio,
Quod sic privilegio
Suo derogatur ;
Illis fortuna
Condolens una
Lamentatur,
Licet his effectuum
Vis supponatur,
Novum opus nunc creatur
Praeter ius suum.

2 b. Ordo stupet naturalis,
Nam a rivulo
Fons manat, a flosculo
[Radix] et causalis
Res a causato,
Sic commutato
Ordine finali
Res tenet principium
Sic variatum,

Idem est causans, causatum,
Sequens praevium.

3 a. Activum verbum passivum
Iam efficitur,
Ab alio nascitur,
Quod est primitivum,
Est compositum
Simplex, finitum
Fit infinitum,
Sic contra grammaticum
Non respectivum
Confertur, non defectivum
Fit eclipticum.

3 b. Nunc logicus admirari
Cogitur, quia
Simul sunt contraria
Scita sociari,
Partus pudori
Et ita mori
Hic locus: Haec mari
Mulier concubuit,
Si partu laeta
Fiat, nam eadem feta
Et virgo fuit.

4 a. Hic mussat Quintilianus,
Marcus Tullius,
Symmachus, Sidonius,
Iustinianus,
Cum virginitas
Et maternitas
Sint simul, et varius
Index adulterii
Partus fiat his,
Qui signo carent signati,
Fiunt dubii.

4 b. In his haesitans stupescit
Arithmeticus,
Nam numerus cubicus
In se decrescit,
Suae radici
Ut possit dici
Conformis, hic nescit,
Quomodo, quae numero
Caret, natura
Numeratur et sic plura
Possit fieri.

5 a. Musicae proportioni
Cum sint subdita
Omnia composita,
Musicus componi
Deum homini,
Nubem lumini
Miratur, sic toni
Melos cum diapente
Fit par sonorum,
Tota lege musicorum
Hoc prohibente.

5 b. Tetragonus continetur
Infra trigonum,
Trigonus infra conum,
Iam maior habetur
Punctum linea,
Equo tinea,
Centrumque censetur
Excedere circulum,
Minor pigmaeo
Fit gigas, alvus fit Deo
Receptaculum.

6 a. Astronomus visu, mente
In hoc haesitat,
Quod sol latitat
Sub stella, manente
Solis splendore,
Stella plus more
Pristino lucente.
Hoc ab illo vilius
Non fit lucendo,
Sed se mutuo augendo
Lucent purius.

6 b. Haec est virgo singularis,
Parens unica,
Arctos nautica,
Portus salutaris,
Vena veniae,
Portus gloriae,
Quam dos puellaris
Decoris non deserit,
Immo puella
Manens et virgo tenella
Deum peperit.

7 a. Virgo virginum.
Expers criminum,
Decus hominum,

Caeli domina,
Salus gentium,
Spes fidelium,
Lumen cordium

Nos illumina.

7 b. Nosque filio
Tuo tam pio,
Tam propitio
Reconcilia,
Et ad gaudia
Nos perennia
Duc propitia,
Duc prece pia,

8. Virgo Maria.

ANALECTA HYMNICA

MEDII AEVI.

Herausgegeben
von

Clemens Blume und Gaido M. Dreves.