178. De beata Maria V.

1. Vale, virgo, fragrans rosa,
Rosa visu speciosa,

Rosa sine pretio,
Rosa mirae novitatis,
Quae nos tuae pietatis

Perfundis rosario.

2. Vere dulcis liquor iste,
De quo bibunt agonistae

Currentes in stadio,
Quo refecti roborantur,
Dum devote venerantur

Te laudis officio.

3. Tu rosarum rosa
Vere dicta rosa,

Rosa nupta lilio,
Liliosa rosa Christi,
De spineto processisti

Iudaeae rosario.

4. Tu peccati spina carens,
Semper vernans, nunquam arens,

Agni rubens sanguine,
Nos peccati spina pungit,
Sed te replet et perungit

Suo Deus numine.

5. Tu abundans cunctis bonis,
Sola prior es in donis,

Maior in imperio,
Quae nobis das affluenter
Et custodis nos potenter

A mundi contagio.

6. Flos electe, flos insignis,
Quem praeclaris ornat signis

Summi floris bonitas,
Fac odore tuo pasci,
Quos in Christo vult renasci

Tui cordis caritas.

7. Quae per tuum florem flores,
Dulces mitte nobis flores

Specialis gratiae,
Ut in caelis floreamus
Per te florem, quam laudamus,

Mater regis gloriae.