5. De beata Maria V.

1. Ara Dei, porta spei,
Virgo mater unica,
Per te rei cordis mei
Gandidetur tunica.

2. Ve cunctarum feminarum
Tollens tua gloria
Offensarum contractarum
Purget me de scoria.

3. Mater, audi, sed exaudi,
Sit vox licet quaerula,
Os nam claudi tuae laudi
Mors est, vitae ferula.

4. Riga reum, placa Deum,
Iuva, plena gratia,
Da tropaeum et cor meum,
Te quod famet, satia.

5. Alma Iesse virga, fessae
Mentis ingens pausula,
Tutrix esse velis pressae
Carni mortis clausula.

6. Grata morum forma, thorum
Servans absque macula,
Vitiorum tu meorum,
Virgo, stingue iacula.

7. Cinis ego quamdiu dego
Vitae sub hac formula,
Quidquid rego, tibi lego,
Corrigas anormula.

8. Ave, mitis, a vae litis
Inferni me libera,
Ut cum tritis caelo sitis
Vita fruar libera.

9. Plebis numen, vitae flumen,
Cellula nectarea,
Praebe lumen, fer acumen,
Caeli duc in area.

10, Nati nata, quae beata
Mater es et filia,
Nos post fata duc ad grata
Paradisi gaudia.

11. Dolor urget me, nam turget
Mens et ab amentia
Non resurget, nisi purget
Hanc tua clementia.

12. Mira parens, labe carens.
Cui nulla praevia,
Fac, ne parens sit mens arens
Ad quaeque daemonia.

13. Nusquam tutum est hoc lutum
Carnis infra limina,
Ni per scutum tu virtutum
Longe pellas crimina.

14. Te nutricem, te victricem
Summa super aethera,
Iuxta vicem tam felicem
Laudo super cetera.

15. Cum pro vero mane, sero
Sim expertus talia,
Neque spero, sed nec quaero,
Quod sit talis alia.

16. Benignarum feminarum
Rosa, vernans primula,
Animarum spes lapsarum,
Deitatis rimula.

17. Nevum mentis te colentis
Dele, fer piacula,
Taetrae gentis et furentis
Ne adurat facula.

18. Dictu miro paris viro
Sine, muliercula,
Angui diro mundi gyro
Pulso per haec fercula.

19. Tam sincere te decere
Fidei conubia
Scimus vere, nec latere
Quit res nulli dubia.

20. Tuus fructus nostri luctus
Exsiccavit semina,
Mundi fluctus, carnis ructus
Seda, felix femina.

21. In te cursum tendi sursum
Da per tot naufragia,
Stringens ursum, ne nos rursum
Trahat ad contagia.
22. Murus, porta, byssus, sporta,
Virga nitens aurea,
Me supporta, spe conforta,
Dita caeli area.
23. Livor fellis multis bellis
Turbat cordis atria,
In procellis sub flagellis
Gemit carnis patria.

24. Eia, veni tu et leni

Cordis tot contraria,
Aut in caeni tam obsceni
Submergor angaria.
25. Risu fletum, plausu metum
Muta sedans bellica,
Cor quietum sit et laetum,
Longe sint procellica.

26. Busti die tu, Messiae
Mater, dele vitia
Et post viae cursum pie
Nobis sis propitia.
27. Et cum dirae dies irae
Fiet nimis horrida,
Non perire, sed exire
Fac de zona torrida.

28. Belluina carnis vina,

Mentis quae sunt toxia,
Tu, divina medicina,
Misce, ne sint noxia.

29. Ne tantorum me malorum
Obruant pericula,
Commissorum tu meorum
Dissolve reticula.

30. Dic, Maria, virgo pia,
Unde mihi venia,
Nisi dia in sophia
Spei des encaenia?
31. Tu Sublimis hera nimis,
Duc nos locis, domina,
Ab his imis in opimis
Dubia post omina.

32. Fructu feta, quo deleta
Constat offendicula,
Auge laeta, da quieta
Temporum curricula.

33. Tu sodalis curialis,
Conductrix egregia,
Nos a malis tuis alis
Tege, virgo regia.
34. Ventus urat, hostis furat
Stringat vel inopia,
Mens non curat, quam securat
Tua dulcis copia.

35. Tristis quivis mundi civis
Culpa de praeterita
Potest, si vis, iungi vivis
Tua per praemerita.
36. Tu, quae menti paenitenti
Sola fers colliria,
Asta flenti vel gementi,
Respice suspiria.
37. Iram nati, tam irati
Mollias, christifera,
Ne peccati perpetrati
Poena sit mortifera.
38. Amen, Amen, per affamen
Hoc et per similia
Praestet flamen sanctum, tamer
Si accedant milia.