32. De beata Maria V.

Ave, stella, o Maria,
Praedicaris vitae via,
O Maria, stella maris,
Complanato nobis callem
5. Transituris per hanc vallem,
Ad hoc opus praesignata
Et a Deo nobis data,
Preme pede praevalenti
Caput anguis virulenti,

10. Qui felices nos seduxit
Et in mare nos induxit.
Tu Abrahae iam promissa
Et per Iesse nobis missa,
Virga florens, produc fructum,

15. Qui excludat Evae luctum
Signo virgae sine unda.
Sis honesta mitibus,
Corda nostra tu fecunda
Fronde, flore germinis.

20. Mater Dei, Deo plena,

Caro quibus est in poena,
Pravos motus hic refrena.
Et legatus hoc praedicit,
Deum esse tecum dicit,

25. Te cum fructu benedicit.
Et tu, vere benedicta,
Exinani maledicta,
Quae donavit mater dicta.
Nos per Evam captivati

30. Ad poenarum praevia,
Per te sumus revocati
Ad superna gaudia.
Virgo munda, virgo pia,
Templum Dei, caeli via,

35. Dona nobis caritatem
Et cum sanctis unitatem.
Nati tui praesta visum,
Redde nobis paradisum,
Ubi finis est laborum,

40. Plenitudo gaudiorum.