10. Ad beatam Mariam V.

1. Ave, caelorum ianua,
Mater Dei et filia,
Salutata ab angelo,
Praeelecta a Domino.

2. Ego ad te confugio,
Virgo, mea salvatio,
Salutis spes et veniae,
Mater misericordias.

3. Salva ad te fugientem,
Serva me in te sperantem,
Super omnes te exoro,
Super omnes te imploro.

4. Tu es vere potentior,
Inter omnes dulcior,
Inter omnes humilior,
Inter omnes sublimior.

5. Nullus nempe confundetur,
Sicut reor, nec perdetur,
Qui se tibi commendabit
Et te prece invocabit.

6. O Maria, mater Dei,
Miserere, precor mei
Atque pro me ora Deum,
Ut absolvat tuum reum.

7. Ego tibi me commendo,
Me in servum tibi trado,
O domina, me respice
Et clementer suscipe.

8. Respice me, o Maria,
Dei mater, virgo dia,
Et visita me miserum,
Oppressum mole scelerum.

9. Nam si tu me visitabis,
Visitando me purgabis,
Nam tua visitatio
Mea est salvatio.

10. Serva tibi commendatum,
Tibi servire paratum,
Dono tuae pietatis
Me absolvas a peccatis.

11. Tota enim salus mea
In te est, deorum dea,
Cunctorum, ut creditur,
Ex te salus exoritur.

12. Ille potest desperare,
Qui te non vult amare,
Te Mariam adamare,
Hoc est opus salutare.

13. Nomen tuum dulce nimis
Adamandum est imprimis,
Ubi nomen tuum sonat,
Spem salutis mihi donat.

14. Omne a me perpetratum
Tollit mihi hoc peccatum,
Nunquam possum desperare
Si te volo invocare,

15. Per te, pia, me salvari,
Per te credo reparari,
O Maria veneranda
Super omnesque laudanda.

16. Si me velis adiuvare,
Quis me cogit desperare,
O domina dulcissima,
Prae omnibus carissima?

17. Omnibus tu praeamanda,
Nulla tibi comparanda,
O Maria, Deo cara,
Virgo nitens et praeclara.

18. Sed mente praeclarior
Moribusque nobilior,
Tota super solem munda,
Omni bono tu fecunda.

19. Virgo semper, ante partum
Et in partu et post partum,
Iure cunctis es praelata,
Super omnes exaltata.

20. Semper casta, semper pura,
Semper Deo placitura,
Nunquam levis,nunquam vana,
Ac si esses inhumana,

21. Domina o dominarum
Et regina reginarum,
Propter tuam pietatem,
Tuam quoque bonitatem.

22. Pauper ego et egenus,
Sum obscenis meis plenus,
Natum tuum irritavi,
In quem graviter peccavi.

23. Hunc tu mihi pacifica,
O mater Dei unica,
Hoc te posse impetrare
Nemo debet dubitare.

24. O praeclara stella maris,
Quae cum Deo gloriaris,
Me ad portum fac venire,
Nunquam sinas me perire.

25. O Maria, lumen vitae,
Mihi, quaeso, imperii te,
Servum iustifica tuum
In peccatis mortuum.

26. O Maria, flos virginum.
Ora pro me Dominum,
Ut ad caeli palatia
Perveniam te praevia.

27. Ubi miser et sordidus
Possim esse et ultimus
Laudansque Deum deorum
Per saecula saeculorum.