6. De beata Maria V.

1. Audi, clemens et benigna.
Te precantum vota digna,

Preces et suspiria,
Ad te, pia, suspiramus,
De profundo clamitamus,

De gravi miseria.
2. Audi, salus nostrae spei,
Mater iudicis et rei,

Fer nobis auxilium,
Culpa gravis nos depressit,
Quae culpa metas excessit,

Exhibe consilium.

3. Audi, mitis, audi, pia,
Tui sumus, o Maria,

Filii miseriae,
Audi, nostra advocata,
In conspectu Dei grata,
O regina gloriae.
4. Memor esto, quam iucundum,
Quam magnum quamque pro-
fundum
Fuit hoc consilium,
Gabriel dum inquit Ave,
Dum per verbum hoc suave
Concepisti filium.
5. Audi nostrum detrimentum,
Posce nobis incrementum

Inclito precamine,
Tutum populum conserva,
Cleri tui cum caterva
Serva sine crimine.
6. Hostes fuga, pelle metum,
Differ iudicis decretum
Mortisque sententiam,
Nobis miseris intende
Et iudicium suspende
Propter paenitentiam.

7. Memor sis, quem genuisti,
Dum ad templum detulisti

Magno cordis iubilo,
Memor esto mortis Christi,
Dum pendentem conspexisti

Crucis in patibulo.

8. Memor esto resurgentis
Et in caelum ascendentis

Multiformis gratiae,
Qui te semper honoravit,
In aevum laetificavit

Sua clara facie.

9. Super gloriam sanctorum,
Super choros angelorum

Te vexit, dignissima;
Statum nos perfectionis
Doce, vas electionis,

Sanctorum sanctissima.

10. Posce nobis fidem rectam
Caritatemque perfectam,

Lumen sapientiae,
Corporis integritatem
Spiritusque puritatem,

Fructum abstinentiae.

11. Virtutum infusione,
Carismatum sanctione

Omne fuga vitium,
Luce contemplationis,
Gustu consolationis

Exhibe solacium.

12. Memor sis universorum,
Vivorum et mortuorum,

Totius ecclesiae,
Posce nobis finem bonum,
Addens singulare donum

Et tuae praesentiae.

13. Audi, clemens, audi, pia,
Audi, dulcis o Maria,

Post praesens exsilium
Offer nobis cum gaudio
In caelesti tripudio

Iesum tuum filium.