12. De beata Maria V.

1. Ave, Dei genetrix

et immaculata,
Virgo, caeli gaudium,

toti mundo nata,
Ad salutem omnibus

in exemplum data,
Dignare me laudare te,

o virgo sacrata.

2. Reple cordis intima

spiritu sacrato,
Ut corpus et anima,

lingua cum palato
Laudi sint comparia

dignae tuo nato,
Qui per te conumeret

gregi nos beato.

3. Benedictus Dominus

sit, qui te creavit
Et in matris utero

te sanctificavit
Et beata viscera

tua inhabitavit
Atque in caelestibus

te glorificavit.

4. Maria, cum filius

sit suavitas et vita,
Ad eius delicias,

pia, nos invita,
Sua nobis mansio

per te fiat scita,
In qua ipsa requies

consistat munita.

5. Omnes morbos animae,

caelica regina,
Sanet, curet, auferat

tua medicina,
Ut quando progredimur

de mundi sentina,
Nos in caelo collocet

dextera divina.

6. Cuius celsitudinem

proni supplicamus,
Ut poenas et laqueos

mortis evadamus
Ac tuis obsequiis

sic nos innectamus,
Ut per te caelestia

regna conscendamus.

7. Virgo, sancta trinitas

fecit mansionem
Tecum, praebens gloriae

praegustationem,
Et virtutum omnium

dat perfectionem,
Matrem Christi faciens

per electionem.

8. Benedicta, benedic

te benedicentes,
Fac in tuis laudibus

sint proficientes,
Affice dulcedine

tua nostras mentes
Ut in tuis laudibus

semper sint ferventes.
9. Honor tibi semper sit

virginum regiuae,
Quae in aula caelica

regnas sine fine,
Prece tua subveni

genti peregrinae,
Ne in fine saeculi

pateat ruinae.

10. O flos pudicitiae,

mater pietatis,
Sidus castimoniae,

dos virginitatis,
Plenitudo gratiae

forma aequitatis,
Exordium laetitiae,

hortus voluptatis.
11. Arcanis dominicis

virgo tota plena,
Exstirpatis vitiis

intus nos serena,
Ut nostrorum scelerum

hic indulta poena
Nos caelestis patriae

ducas in amoena.
12. Nato nunc virgineo

cordibus intensis
Assistamus iugiter

et manibus extensis
Resonemus labiis

nostris in condensis
Actionis gratiae

pro donis impensis.