13. De beata Maria V.

1. Ave dic ad virginem,
Genetricem gratiae,
Salutis dulcedinem,
Fontem patientiae.
2. Haec est aula regia,
Regina prudentiae,
Virgo plena gratia,
Aurora laetitiae.

O. Haec est melle dulcior,
Castitatis lilium,
Iaspide splendidior,
Gaudii solacium.
4. O fons admirabilis,
Fidei principium,
Mater amicabilis,
Vas odoris pretium.

5. Tu es regis speciosi
Mater honestissima,
Odor nardi pretiosi,
Rosa suavissima.
6. Arbor vitae, digna laude,
Stella fulgentissima,
Generosa mater, gaude,
Virginum sanctissima.
7. Tu es via peccatorum,
Regina consilii,
Quae concepit florem florum,
Christum, fontem gaudii.
8. Virga Iesse, lux sanctorum,
Donatrix auxilii,
Memor esto miserorum
In die iudicii.

9. Tu es mundi gaudium,
Caritatis regula,
Tu chorus caelestium,
Aromatum virgula.

10. Sit tibi, flos omnium,
Virgo sine macula,
Honor et imperium
Per omnia saecula.