15. De beata Maria V.

1. Ave, laetitia, Ioachim dulcedo, Maria,
Vitae munditia, caelesti plena sophia,
Eiciens vitia largire charismata dia.

2. Murus honestatis, thalamus summae deitatis,
Aura voluptatis, tellus promissa beatis,
Regula recta ratis, virguncula florida satis,
Infula praelatis, stola candida sanctificatis,
Ablue peccatis infectos, fons pietatis.

3. Gemma salutatis, spes nostra, Sion specularis
Regina solaris et regni clavicularis,
Aula puellaris et aperta scientia gnaris,
Tu decor altaris, puteis tu dulcor amaris,
Ianua templaris, quae clausa Deo generaris,
Aurea stella maris, placa mare, cui dominaris.

4. Pura Dei matrix, ovis amissae miseratrix,

Lampadis ornatrix, decimae drachmae cumulatrix,
Enoch servatrix et Eliae, Iob relevatrix,
Nostra reformatrix, Domini Sabaoth mediatrix,
Assis, mundatrix animae, mundi reparatrix.

5. Dux gregis aetheri, gaza solis, stella diei,
Olla lebesque spei, speculum nostrae faciei,
Munda farina Dei sine fermento pharisaei,
Iusta medela rei, portus nostrae requiei,
Norma sacrae fidei, damnas haeresin Manichaei,
Urna capax olei, flos egregie Nazaraei,
S.............

6. Tellus fecunda, sacri baptismatis unda,
Egregia, facunda, rosa mundi, rosa munda
Cumque gemebunda sustinens et sanguinis unda

U.............

Mundos circumda maculosaque pectora munda.