16. De beata Maria V.

1. Ave, lumen gratiae,
Fons misericordiae,

Virgo fecundata,
Radix pudicitiae,
Spes aeternae gloriae,

Regina beata.

2. Ave, venerabilis,
Mater admirabilis,

Per quam lux est orta,
Flos incomparabilis,
Splendor ineffabilis,

Felix caeli porta.

3. Ave, novum gaudium,
Salutis exordium,

Lumen veritatis,
Caeli luminarium,
Languoris remedium,

Forma sanctitatis.

4. Ave, lucis speculum,
Christi tabernaculum,

Virgo benedicta,
Quae salvasti populum
Pariendo parvulum,

Per quem mors est victa.

5. Ave, ros dulcedinis,
Nitor, pulchritudinis,

Rosa sine spina,
Via rectitudinis,
Turris fortitudinis,
Vitae medicina.

6. Ave, spes fidelium,
Castitatis lilium,

Victoriae palma,
Spiritus sacrarium,
Dulce refrigerium,

Dei mater alma.

7. Ave, beatissima,

Magna, maior, maxima,

Praelata caelorum,
Virgo clementissima,
Gemma fulgentissima,

Vera lux sanctorum.

8. Ave, stella fulgida,
Virga Iesse florida,

Radix virtuosa,
Cuncta sanans morbida,
Labe carens sordida,

Mater generosa.

9. Ave, summa domina,
Quae desuper agmina

Caeli sublimaris,
Cor meum illumina
Et ab hostis machina

Semper tuearis.
10. Ave, o puerpera,
Surge, veni, propera,

Tua sancta prece
Mea dele scelera
Ac me prorsus libera.

De peccati faece.

11. Ave, hospes animae,
Mibi, precor intime,

Iter para tutum,
Hostis fraudes reprime
Et peccata dirime,

Domina virtutum.

12. Ave, salus omnium
Dulceque solacium.

Pro me semper ora
Et post hoc exsilium
Apud tuum filium

Veniam implora.

13. Ave, meque visita
Atque sursum excita,

Dulcis mater Dei,
Pietate solita
Pro me natum rogita,

Semper memor mei.

14. Meisque reatibus
Tuis parcat precibus

Auctor pietatis
Ac mundatis sordibus
Mihi det cum civibus

Vivere beatis.