19. De beata Maria V.

I.

1. Ave, maris stella,
Verbi Dei cella,

Veri solis aditus,
Maris aufer bella,
Sopita procella
Da securos transitus.

2. Inter tot flagella,
Lux semper novella,

Fer opem divinitus,
Pro nobis compella,
Mitis ut agnella,

Missum agnum caelitus.

3. Naufragis tabella,
Manna dans capsella,

Templum sancti spiritus,
Virtutum castella,
Bases, capitella

Tenes in te penitus.
4. Virgula tenella,
Permanens puella

Post partum et primitus,
Sacra per labella
Natum interpella

Pro nobis medullitus.

5. Tu pro nobis bella
Potenter debella,

Malignorum fremitus,
Plue pacis mella,
Fac pedum scabella
Pulsos hostes funditus.

6. Tuos nos appella,
Tua sub ascella

Muni nostros obitus;
Ave, maris stella,
Sed prae stellis bella
Per caelorum ambitus.

II.

1. Ave, stella maris,
Virgo singularis,

Flos et forma virginum,
A Deo donaris,
Esse comprobans

Vera salus hominum.
2. Se pro suis caris
Lapis angularis

Mons infudit culminum
Sedibus praeclaris
Ventri puellaris

Velut imbrem graminum.

3. Concipis et paris
Sine tactu maris

Regem fortitudinum,
A quo tu crearis,
Quae ipsa miraris

Florem pulchritudinum.
4. Regina vocaris,
Gemma declarans

Supernorum ordinum,
Ubique laudaris,
Splendor praedicaris

Beatorum agminum.

5. Aurora solaris,
Aura salutaris,

Noctem pelle criminum,
Quotiens rogaris,
Ut miserearis,

Ne exspectes crastinum,

6. Pravis et ignaris
Et in bono raris

Prece placa Dominum,
Gratia ditaris,
Ut exaudiaris

Iuxta morem pristinum.

7. Lampas specularis
Summi luminaris,

Vena fontis luminum,
Fac, ut tuearis
A poenis amaris

Vitae nostrae terminum.

8. Quibus memoraris,
Fac, ut videaris

In regno dulcedinum,
Ave, stella maris
Et prae stellis claris

Iubar claritudinum.

III.

1. Stella maris, ave,
Germen tam suave

De Iesse progrediens,
Sed plebis ignavae
De felle spinave

Nil omnino capiens.

2. Evae damnum rave
Restaurans per ave,

Luctum Evae nesciens,
At intra conclave
Tam iucundum ave

Gabrielis audiens.

3. O mellite fave,
Vigor semper gnave,

Virtus indeficiens,
Tuae precis clave,
Ne nos laedat, cave,

Leo nequam rugiens.
4. Mentis nostrae pravae
Iugum rumpe grave,

Nos ab hoste muniens,
Viae dux et clave,
Destrue fugave

Saevientem totiens.

5. Mater Christi, fave,
Sis nobis pro ave

Miseris compatiens,
Et quos premit, ha, vae
Pondus insuave
Liberes adveniens.

6. Corda nostra lave,
Nos ut salvet a vae

Patri compar oriens,
Stella maris, ave,
Tibi semper ave

Super omne quotiens.