25. De beata Maria V.

1. Ave, plena gratia,

Virgo singularis,
Vena fluens venia,

Dulcor in amaris,
Erue, propitia,

De profundo maris
Miseros, quos propria

Dextra tuearis.

2. Arce fraudes hostium,

Fraudis inimica,
Robur te querentium

Pacis et amica,
Imminentem terminum

Lucis tuae mica,
Absit lues sordium,

Sitque mens pudica.

3. Gratior prae ceteris,

Ferre Christum digna,
Reginarum praeteris
Cuncta laudum signa,

Ablue nos sceleris
Faece tu, benigna,

Cuiuscunque generis
Amove maligna.

4. In caelestis patriae

Sede stabilita,
Ad tuae clementiae

Fontem nos invita,
Potum nobis gloriae

Parans in hac vita,
Laus tibi laetitiae

Patet infinita.

5. Eia, sancti spiritus

Fecundata rore,
Nati tui caelitus

Reple nos amore,
Animusque concitus

Sit eius timore,
Diro quo sit penitus

Liber a furore.

6. O beata virginum

Mater et regina,
Morbos aufer criminum,

Vitae medicina,
Imminentem terminum

Mortis es ruina

Notum fac et Dominum

Pandere festina.

7. Valetudinarium

Languidis paratum,
Sanans aegrotantium

Morbum et reatum,
Tecum geris pretium

Pro salute datum,
Egris post remedium

Dans felicem statam.

8. Carens omni carie.

Nutrix Deo cara,
Vas misericordiae,

Datrix non amara,
Mater esto veniae,

Spes et lux praeclara,
Beataeque curiae

Nobis iter para.

9. Exsules ad proprium

Solum reduxisti
Nati per supplicium,

Passum quem vidisti,
Eius mortis gladium

Undique sensisti,
Demum hic in gaudium

Cuncta convertisti.

10. In te confitentibus

Fons auxiliorum,
Confer lumen cordibus

Honestatis morum,
Tuis tuens precibus

Agmina tuorum,
A te postulantibus

Dans regna caelorum.

11. Tu puella nobilis

Nimis et formosa,
Vitae venerabilis
Luce radiosa,

Iubar sine nubilis
Lustrans tenebrosa,

Nudo vestis habilis
Contege probrosa.

12. Mulierum omnium

Summa dignitate,
Vigor invocantium

Mentis illustratae,
Libera cor noxium

Culpae caecitate
Innuens consilium

Nitens veritate.

13. Ergo, felix condita

Mater es ancilla,
Rutilas ut edita

Flamma de scintilla,
In qua spes est posita

Mundi, tu es illa
Bona dans abscondita

In aede tranquilla.

14. Visita nos saepius

Compassiva cura,
Sensus ut sit sobrius

Actioque pura
Evitando cautius

Cuncta nocitura,
Teneas superius

Gaudia futura.

15. Benedictus uteri

Sacri tui fructus
Evae crimen conteri

Praestitit et luctus,
Ne mergantur posteri

In tam saevos fluctus,
Ex quo solet conqueri

Vir Adam seductus.

16. Dulci merce veniens

Navis onerata,
Imple cor esuriens

Prole per te data,
Cuius plebs concipiens -

Ergo tu Iaetata

Tota vi perficiens

Caelica mandata.

17. Vitae de te promitur

Potus sitibundo,
Sitis ex quo tollitur

Universo mundo,
Faciamus igitur

Opere secundo,
Recte quod praecipitur

Pectore iucundo.

18. Veritatis tramitem

Famulis ostende,
Caritatis fomitem

Cordibus accende,
Te fac nostrum limitem

Rei peragendae
Viarumque comitem

Te nobis impende.

19. Scala tu perpetua

Et caelorum via,
Vitae patens ianua

Et legis sophia,
Elige melliflua,

Precum virgo pia,
Nos ad tua pascua,

Dulcis o Maria.
20. Turris o tutissima,

Tuos intuere,
R . . . . .

In dierum ultima
Curam nostri gere,

Saevos, o fortissima,
Hostes manu tere.

21. Tua sic nos regula

Regat ad certamen,
Ut post fracta vincula

Carnis et luctamen
In sublimi specula

Det nobis solamen,
Qui vivit in saecula

Saeculorum. Amen.