34. De beata Maria V.

1. Ave, virga ferens fructum,
Primae matris tollens luctum,

Nobis confer gaudia ;
Haec est summi mater Dei,
Quae pudoris virginei

Servat privilegia.

2. Ut vitrum solis radio
Non laeditur nec filio
Matris castimonia ;
Decantemus omnes ei,
Corde, voce, quamvis rei,
Laudes et praeconia.

3. Haec est nardus dans odorem,
Cuius odor salvatorem

Traxit ad humilia,
Fons signatus, clausus hortus,
Ex quo Christus est exortus

Corporis praesentia.

4. Flos campi atque lilium,
Singulare convallium

Vitae praeminentia,
Humilitate viola,
Mundi continens frivola

Virtutis constantia.

5. Tu murtus temperantia,
Tu rosa patientia,

Oliva clementia,
Fons hortorum et puteus
Aquae vivae, non luteus,

Fluens abundantia.

6. Voluptatis paradisus
Libanusque non incisus

Spirans beneficia,
Cedrus fugans venenata
Haereticorum dogmata

Odoris fragrantia.

7. Balsamus et cinnamomum,
Ex te sibi fecit domum

Deus creans omnia,
Tu civitas refugii
Spes totius remedii,

Tu caeli porta pia.

8. Turris, quae nequit deici
A facie inimici,

Diceris, o Maria ;
Nunc, virgo venerabilis,
Per te sit excusabilis

Nostra iniustitia.

9. Ne nos pro nostro vitio
Deputemur supplicio,
Tu, pia, nos libera
Hostis a nequitia,
Ut gaudiis tecum frui,
Nos quaesumus, servi tui,
[Tecum super aethera]
Queamus in gloria.