35. Ad beatam Mariam V.

1. Ave, virgo gloriosa,
Mater Christi speciosa,

Virgo admirabilis,
Ave, Deum genuisti,
Regem regum peperisti,

Virgo ineffabilis.

2. Te collaudant et angeli,
Te adorant archangeli,

Cives omnes angelici
Te videntes benedicunt,
Procidentes tibi dicunt:

Ave, mater Domini.

3. Ante partum tu fuisti
Et in partu permansisti

Et post partum castitas,
Sponsa Christi, mater Christi
Es et eris et fuisti,

O summa virginitas.

4. Assis nobis, virgo pia,
Quae vocata es Maria,

Stella maris rutilans,
Tu pro nobis semper ora
Ad filium sine mora

Veniamque postulans.

5. Te adiuti gloriemur
Absolutique laetemur

A peccatis omnibus,
Ne Satan cum suis turmis
Nos congreget in extremis

Poenis infernalibus.

6. Ne damnemur cum impiis,
Sed dignis precibus tuis

Valeamus scandere,
Ubi manes cum filio,
Cum patre, cum paraclito,

Cum sacro tuo foedere.

7. Tibi, Christe, sit gloria
Cum matre tua Maria

Hic et in caelestibus;
Hymnus iste sit devotus
Tibi semper atque gratus

In Mariae laudibus.