39. De beata Maria V.

1. Ave, virgo singularis,
Mundi portus salutaris

Singulari gloria,
Porta solis orientis,
Orbis sidus occidentis

Speciali gratia.

2. Paradisus voluptatis
Thalamusque castitatis,

Cella pigmentaria,
Hortus clausus, fons signatus,
Ager florens, irrigatus
Spiritali pluvia.

3. Rorans vellus Gedeonis
Ferculumque Salomonis,

Angelorum gloria,
Domus Dei, quam fundavit,
In qua thronum collocavit

Patris sapientia.

4. Ave, rosa spina carens,
Virga Iesse, virgo parens,

Viri tamen nescia,
Tu, regina, regem paris,
Cuius sola nuncuparis
Sponsa, mater, filia.

5. Stella caeli, cuius ortus
Nos ad vitae traxit portus

Post mundi naufragia,
Paradisi tu fenestra,
Non quod tuos feras extra,

Sed infra palatia.

6. Tu specular verae lucis,
Quae ad veram lucem ducis

Nostrae noctis taedia;
Ave, sidus matutinum,
Fletum tergens vespertinum,
Dans post luctus gaudia.

7. Deitatis sacramentum,
Novae legis argumentum,

Vitae pandens atria,
Carta Dei, quam inscripsit,
In qua verbum suum scripsit
Patris providentia.

8. In qua verbum substantivum
Fecit pater adiectivum

Adiecta substantia,
Lectus rosis praeparatus
Et multorum candidatus

Liliorum copia.

9. In quo sibi copulantur
Et se simul osculantur

Christus et ecclesia,
Novum genus nuptiarum,
In quo nova naturarum

Parantur coniugia.

10. Ave, mater, virgo tamen,
Quam fecundat verbo flamen

Non viri materia,
Ergo rivus parit fontem,
Virga cedrum, vallis montem

In magnificentia.

11. Flos pudoris, non efflorens,
Cedrus alta, palma florens,

Vallis gignens lilia,
Flagrans domus unguentorum,
Aula Dei, divinorum

Secretorum conscia.

12. Mirus odor in hac domo,
Plena ture, cinnamomo

Omnique fragrantia,
Ergo, nostri mediatrix,
Nostra salus et salvatrix,

Nobis sis propitia.

13. Nos abiectos pro peccato,
Nata, patri, mater, nato

Clementer concilia,
Via vitae, duc ad portum,
Stella maris, duc ad ortum

Per tot maris devia.

14. Dulcis mater Iesu Christi,
Quae Satanam devicisti

Miranda potentia,
Nato iube, regem ora,
Ut peccati sine mora

Nobis detur venia.