40. De beata Maria V.

1. Ave, virgo, stella maris,
Ave, mater expers maris,
Sola parens patrem paris

Fecundata caelitus.
Salve, virgo, spes reorum,
Salve, mater, spes lapsorum,
Per quam mundo rex caelorum

Illuxit humanitus,
Miserere peccatorum

Consolando gemitus.

2. Gaude, virgo generosa,
Gaude, mater gloriosa,
In hac valle procellosa

Nobis esto praevia.
Vale, virgo, sponsa Christi,
Vale, mater, quae dedisti
Et lac illi praebuisti,

Per quem vivunt omnia,
Per Christum, quem genuisti,

Trahe nos ad gaudia.

3. Amen dicat, qui mendicat
In hac valle flebili,
Ut solamen et iuvamen
Plebi detur humili.