42. De beata Maria V.

1. Ave, virgo virginum,

Decus castitatis,
Ave, salus hominum,

Mater pietatis,
Ave, sidus lucidum,

Sidus claritatis,
Flos cuius dat floridum

Florem defloratis.

2. Ave, candens lilium,

Nostra spes, Maria,
Ave, dulce gaudium,

Veritas et via,
Salus, spes, remedium,

Gemma, lux, sophia,
Mihi des auxilium,

Voce posco pia.

3. Ave, domus regia,

Porta salvatoris,
Mater atque filia

Summi creatoris,
Ave, mundi claritas,

Ave, flos odoris,
Ave, casta castitas,

Casti fons amoris.

4. Ave, virgo pariens

Natum absque pari,
Ex te fulgor oriens

Dignus exaltari,
Ave, fovens gremio

Florem puellari,
Cuius mundus pretio

Meruit salvari.

5. Ave, mater caelica,

Sumens illud Ave,
Quod tulit angelica

Tibi vox suave,
Ave, plena gratia,

Stella maris, ave,
Assit tua gloria,

Meis votis fave.

6. Ave, flos clementiae,

Ave, fulgor stellae,
Ave, pudicitiae,

Ave, flos puellae,
Ave, mater regia,

Mala mea pelle,
Tua sunt officia

Dulciora melle.

7. Ave, dulce lilium,

Rosa sine spina,
Ave, dans auxilium

Et caeli regina,
Ave, mater gloriae,

Mater et divina,
Ave, lux iustitiae,

Stella matutina.

8. Ave, virgo florida,

Mater pupillorum,
Ora tuum filium

In choro suorum,
Ave, gemma splendida,

Virtus miserorum,
Ut me cum familia

Collocet sanctorum.

9. Ave, decus virginum,

Audi me clamantem,
Audi, salus hominum,

Audi me precantem
Teque tuum filium

Audi me clamantem,
Sic et in perpetuum

Ave decantantem.