44. De beata Maria V.

1. Beata Dei genetrix,
Virgo inaestimabilis,
Te spem meam constituo,
Me tibi servum offero.

2. Fide tua me suscipe,
Nato tuo restitue,
Mea infelix anima
Non sit in fine perdita.

3. Praesta mihi subsidium,
Dum hoc relinquo saeculum,
Et cum recedet spiritus,
Meis adesto precibus.

4. Nam te orante, domina,
Sanctorum surgent milia,
Si tu sola tacueris,
Vox erit nulla ceteris.

5. Noli silere, domina,
Esto mihi propitia,
Cunctis locis me protege,
In viam pacis dirige.