47. Oratio ad beatam Mariam V.

1. Clemens et dulcissima regina caelorum,
Humanum praesidium, solamen dolorum,
Spes post Deum unica, sis memor tuorum
Et fac, ut in numero simus salvandorum.

2. Sis nostra protectio, mater illibata,
Fac, ut vita nostra sit nato tuo grata,
Et per te nos societ angelorum choris,
Qui nos emit pretio proprii cruoris.

3. Cunctorum peccaminum nobis impetrare
Apud Deum veniam, domina, dignare,
Cum Christus voluerit hinc nos transmigrare,
In caeli palatio fac nos habitare.