52. De beata Maria V.

1. Digna laudum carmina,
Vocum modulamina
Nostra sonent agmina
Tibi, caeli domina.

2. Vera cuius nomina,
Patris parens femina,
Supra caeli culmina
Stola gaudens gemina.

3. Luce vincens lumina,
Vere videns numina,
Revelans velamina
Legis et volumina.

4. Fac pro nobis famina,
Ut tua precamina
Sint nobis iuvamina,
Quae nostra peccamina

5. Deleant et crimina;
Insultus extermina,
Reatus elimina
Mundique molimina.

6. Contra fastus fulmina,
Motuum discrimina,
Babylonis flumina
Da salutis omina,

7. Spei delectamina,
Fidei regimina,
Caritatis tegmina,
Virtutis libamina,

8. Panis vitae fragmina.
Caecum cor illumina,
Tristi luctum termina,
Sere morum semina,

9. Rege, fove germina;
Post mundi certamina
Lucis intra limina
Pia prece nos mina.