64. De beata Maria V.

Gaude, rosa speciosa,
Gemma splendens pretiosa,
Virga Iesse fructuosa,
Deum caeli peperisti,
5. Mundo lapso succurristi,
Nexum mortis denexisti.
Virgo Dei sanctissima,
Tu pax mundi tutissima
Et vitis fecundissima.

10. O mater virtutum,
Servis tuis scutum
Semper praebe tutum,
Ut hostes pravae sortis
Ipsi vincant fortes,

15. Ne malorum sint consortes.
O Maria, mater pia,
Mundi salus, vitae via,
Opem a te quaero,
Mater, non despero,

20. Sed iuvamen spero.
Solve tu meorum
Vincla peccatorum,
Lumen angelorum.
O fons indeficiens,

25. Ad te curro sitients,
Dulcis et reficiens,
Imple desiderium
Cordis et suspirium,
Dulce refrigerium.

30. In me robur insere,

Ut hostem possim vincere
Et semper tecum vivere.
Mater dulcis, nos dignare
Tua laude confirmare

35. Et virtute roborare.

Ne in mundo hoc cadamus,
Te iuvante evadamus,
Lapsi per te resurgamus.
Virgo dulcis parens,

40. Tactu viri carens,
Miro modo peperisti,
Deum caeli genuisti,
A quo facta tu fuisti,
Per quem virgo remansisti,

45. Tu in mundo es electa
Et ab ipso es protecta,
Cuius mater es dilecta.
O res mira, virtus mira,
Illibata permansisti,

50. Natum tuum praemisisti,
Ad cuius dextram resedisti,
Quando mundum reliquisti.
Ibi semper veneraris
Et cum ipso gloriaris.

55. O quam pium est laudare
Matrem Dei et amare,
Quae laudantem protegis
Nec plorantem despicis,
Sed quasi mater respicis.

60. Gaude, mater pietatis,
Gaude, norma caritatis,
Gaude, via sanctitatis,
Gaude, virgo castitatis,
Gaude, templum trinitatis.