76. De beata Maria V.

1. Imperatrix angelorum,
Regina archangelorum,
Mater regis saeculorum,
Salve, virgo virginum.

2. Ave, salus peccatorum,
Consolatrix miserorum,
Salve, spes desolatorum,
In te confidentium.

3. O regina mirabilis,
Clemens et ineffabilis,
Mater Dei et hominis,
Ora pro nobis filium.

4. O Maria laudabilis,
Sanctissima et humilis,
Succurre nobis miseris
Ad nostrae mortis exitum.

5. Ave, Dei gloriosa,
Mater Dei pretiosa,
Stella maris luminosa
Sicut solis radium.

6. O benigna gratiosa,
Multum virgo speciosa,
In hac valle lacrimosa,
Da nobis auxilium.

7. Ave, vas munditiae,
Fons misericordiae,
Portus in dulgentiae
Via navigantium.

8. O puella virginalis,
Sponsa Dei specialis,
Non fuit in mundo talis
Inter choros virginum.

9. O regina singularis,
Quae Maria nominans,
Salva nos a cunctis malis
Et da verum gaudium.

10. Ave, virgo castissima,
Mater Dei sanctissima,
Spes nostra o dulcissima,
Confer nobis remedium.

11. O virgo sacratissima,
Super omnes purissima,
Esto nobis propitia
Pro salute fidelium.

12. Pia mater amabilis,
Ora pro tuis famulis,
Ne pereant cum miseris
In inferni supplicium.

13. Christe, fili Dei patris,

Pro amore tuae matris

Colloca nos cum beatis

In caeleste palatium.