87. Oratio ad beatam Mariam V.

Maria, sole clarior
Omnique gemma carior,
Caeli nive candidior,
Ipsoque caelo mundior;
5. Tu, quam creavit Dominus,
Consecravit altissimus,
Repleta sancto flamine
Fers florem claro germine.
Ille te fecit gravidam,

10. Qui suam dedit gratiam,
Ut esses habitaculum
Semper illi mundissimum.
Audi, Maria domina,
Audi, precum suspiria,

15. Virgo mater cum filio,
Caelorum rege proprio,
Fer opem nobis miseris,
Quos turbat caro fragilis
Et subveni quantocius,

20. Quos premit hostis pessimus.
Et nunc mihi praecipue,
Dans me vitae perpetuae
Per tua sancta merita,
Christo Deo gratissima.

25. Qui malo meo merito
In omnem culpam subito
Infelix nimis corruo
Atque in morte iaceo.
Non est, qui manum porrigat

30. Vel succurrendo erigat,
Nisi, o tu dulcissima,
Quae mater es piissima.
Consurge pro me, domina,
Funde pro me precamina,

35. Si scis, quod sit necessitas,
Funde planctus et lacrimas.
Puella nobilissima,
Virgo elegantissima,
Ingenua, clarissima

40. Atque speciosissima,
Pro nimium me misera,
Multum infelicissima,
Plangentem te cum lacrimis
Numquid is ferre poterit,
45. Qui natus est in tempore

De tuo sancto corpore?
Nam si surgis, o domina,
Ut mihi des iuvamina,
Surgit tecum clarissima

50. Caelestis tota curia;
Si pro me rogas veniam,
Pietatem inveniam.
Maria, honor virginum,
Christi norma fidelium,

55. Esto mihi refugium

Nunc et semper auxilium.
Fac mundam mente, corpore,
Fac subditam iustitiae,
Fac vivere virtutibus

G0. Et mundam fac sceleribus.
Sit iter placidissimum
Caelorum ad palatium,
Sis mihi lumen praevium
Ad paradisi gaudium.

65. Benedicta, sanctissima,
Quae reparasti saecula,
Quae genuisti filium,
Regem victorem hostium.
Quibus verbis te invocem

70. Aut quibus nunc te postulem,
Quas tibi fundam lacrimas,
Quas voces promam intimas,
Ut me indignam audias
Et, quod precor, perficias?

75. Audi, Maria domina,
Audi, mater dulcissima,
Terret me trepidatio
Et mortis exspectatio,
Ob hoc ad te confugio,

80. Quae nostra es redemptio.
Nam quando Christum videro
Nec non et in iudicio
Ante suam praesentiam
Ad te, mater, confugiam.

85. Ad te currens, o domina,
Ante tua vestigia
Abs te quaeram praesidia
Et, si facultas fuerit
Aut si forte licuerit,

90. Tuis adhaerens pedibus

Strictis tenebo manibus,
Altis dicendo vocibus
Cum ingentis clamoribus
Ac lacrimosis planctibus
95. Et cum duris singultibus:
O Maria dulcissima,
O Maria carissima,
Adiuva me, o domina,
Succurre mihi miserae,

100. Succurre mihi perditae
Et noli me despicere
Nec orphanam relinquere,
Quae te ut matrem colui,
Te dominam perhibui,

105. Amorem in te habui,
Tibi servire studui,
Cum non servirem, dolui.
Electe aures, ut audias,
Fac, mater, ut exaudias,

110. Ne tardes, ut subvenias,

Festina, ut eripias.
Nam quia nunc te invoco
Et valde multum diligo
Diligereque sitio

115. Ac plus amare cupio
Et servire desidero,
Si pro me supplicaveris,
Si pro me exoraveris,
Christum pro me rogaveris,

120. Si tu me tunc eripies
Et abstrahendo proteges
A malignis spiritibus
Et poenis infernalibus,
Non erit desperatio

125. Nec ulla dubitatio,
Nec a tuo auxilio
Recedam in iudicio,
In illo tunc gravissimo,
Donec des mihi requiem

130. Ante quaerentis faciem.