103. Oratio ad beatam Mariam V.

O Maria, mater Dei,
Habe curam, quaeso, mei
Et, quod rogo corde toto,
Ante mortem, dum aegroto,
5. Daemonum repelle minas,
Me custodi neque sinas
Per languorem delirare
Sensum meum nec errare
Tuam propter pietatem,

10. Sed ad omnem voluntatem
Christi rectus ut perduret,
Tua virtus hoc procuret.
Virgo clarior aurora,
In tremenda mortis hora

15. Post finitos temporales
Annos, quando corporales
Oculi clauduntur mei,
Meae salus esto spei
Et, quod mente rogo tota,

20. Loca ductus ad ignota.
Post hanc villicationem
Dum pravorum rationem
Cogor reddere factorum,
Ubi nullus amicorum

25. Me iuvabit, neque pater

Neque soror neque frater,
Christi vulnera per quina
Ab inferni me sentina
Liberes et per cruorem

30. Sanguinisque per sudorem,
Plagas crebrasque virgarum,
Fellis poculum amarum,
Sputa, probra, quibus laesus
Fuit et in vultu caesus

35. Colaphisque verberatus,
Spinis demum coronatus,
Lanceaeque per fixuram
Et per mortem crucis duram,
Quando clamans exspiravit

40. Et sic mundum reformavit.
Per dolorem, quo flevisti
Totam passionem Christi,
Cunctis locis a poenarum,
A ministris tenebrarum,

45. Pia mater, me defendas,
Mihi, precor, et ostendas
Sacrum tui ventris fructum.
Tuum, virgo, per conductum
Femina, florum decora,

50. Mihi, precor, hoc implora.

Ut sic vivam semper docte
Mane, sero, die, nocte
Taliterque dormiendo,
Vigilando vel iacendo,
Sedens, stans vel incedendo,
Manducando vel bibendo,
Loquens atque meditando,
Vivam sic et operando
Incessanter carne, mente,
Pia virgo, te gerente

Filii per manum fortem
Usque corporis ad mortem,
Ut in morte per te piam,
Quae petivi, cunctis fiam
Tuis dignus adiumentis
Et. sic salver a tormentis.
Pater praestet hoc et natus,
Sacer utriusque flatus,
Trinus unus, qui cunctorum
Dominatur saeculorum.