113. De beata Maria. V.

1. O Maria, virgo pia,
Stella maris, caeli via,

Angelorum domina,
Roga Christum, Deum vivum,
Ut perducat me captivum

Ad caelorum agmina.

2. O Maria, vas honoris,
Medicina peccatoris,

Advocatrix pauperum,
Roga Iesum, pium regem,
Ut ad illum caeli gregem

Perducat me miserum.

3. O Maria, caeli clavis,
Dulcis mater et suavis,

Dolentis solacium,

Me sub tua pone cura,

Libera me, virgo pura,

Placa mihi flium.

4. O Maria, sancta parens,
Flos de spina spina carens,

Pulchra, sine macula,
Serva tibi commendatum,
Illumina tenebratum,

Mea solve vincula.

5. O Maria, templum Dei,
Firmamentum nostrae spei,

Pietatis femina,
Audi preces huius rei,
Sordes purga cordis mei,

Relaxa peccamina.

6. O Maria, Deo grata,
O ter quaterque beata,

Plena Dei gratia,
Adiuva me, virgo clemens,
Ne me sua leo fremens
Trahat ad supplicia.

7. O Maria, vitae vena,
Spiritali rore plena

Totaque dulcedine,
Prece tua salva reum,
Reple mentem et cor meum

Caelesti pinguedine.

8. O Maria, maris portus,
De qua vivus fons est ortus,

Qui sanat et satiat,
Odor tuae sanctitatis
Eruat me de peccatis
Et salvum me faciat.

9. O Maria, mitis rosa,
Sorech vitis pretiosa,

Vinum dans laetitiae,
Suscipe me, mater bona,
Me do tibi, mihi dona

Locum indulgentiae.

10. O Maria, caeli porta,
Desolatum me conforta,

Mihi sis propitia,
Protege me, Dei cella,
Ne involvat me procella

Et tempestas obvia.

11. Iesu, verbum summi patris,
Serva servos tuae matris
Locum donans veniae,
Salva reos, salva gratis
Et nos tuae claritatis
Configura gloriae.