115. De beata Maria V.

1. O mundi prodigium,
Virgo lactans filium,

Deum maiestatis,
Tu Christi hospitium,
Insigne triclinium

Summae trinitatis;
Tu mortis remedium,
Tu vitae praesidium

Morti condemnatis,
Laudes vincis omnium,
Te nullus mortalium

Scit laudare satis.

2. Abigail turbinem
Mentis et acredinem

Irae mitigavit,
Precum per dulcedinem
Placans David sanguinem

Nabal conservavit ;
Sic peccantem hominem,
Mortis in voraginem

Quem culpa prostravit,
Ad salutis ordinem
Per te matrem virginem

Deus revocavit.

3. Rex David insenuit
Senio confriguit

Viribus attritis,
Abisag coniacuit
Et sinu recaluit

Pulchrae Sunamitis;
Sic patris, quae tepuit,
Caritas referbuit

Per te, virgo mitis,
Botrus Cypri floruit,
Quo mundus immaduit

Vino verae vitis.

4. Bersabee mittitur,
Dulciter excipitur

Throno Salomonis,
Thronus matris iungitur,
Adoniae petitur

Abisag in donis;
Sic virgo innititur
Dilecto et fruitur

Potissimis donis,
Nec damnari patitur
Suos, sed abraditur

Lex damnationis.

5. Dum Assuerus imperat,
Hester Aman superat,

Mulier pusilla,
Holofernem verberat
Et concives liberat

Iudith fortis illa;
Sic, dum virgo generat,
Homo spem recuperat,

Nam felix armilla
Leviathan vulnerat,
Homo praedam lacerat

Ex eius maxilla.

6. Ergo, dulcis domina,
Benedicta femina,

Spes desperandorum,
Tua per precamina
Mundentur peccamina

Supplicum tuorum;
Caelitus illumina,
Penitus elimina

Vires temptatorum
Et per haec discrimina
Nos laetos ad agmina

Ducas beatorum.