118. De beata Maria V.

1. O regina reginarum,
Iubar caeli mundo carum,

Dei natum pariens,
Prope sis, ut beatarum
Per te laetus epularum
Gaudium sim hauriens.

2. Per te rasit vetustarum
Iura Deus legum harum
Dura cuncta molliens,
Imperatrix veniarum,
Da foeda vi lacrimarum
Delens sim et abluens.

3. Laude pollens reginarum
Dominarumque cunctarum

Gloriam es transiens,
Iuvans fac, ut regis clarum
Cernam vultum, ne poenarum
Ardeat vis puniens.

4. Hostem sternis humanarum
Pariter creaturarum

Vita mortem auferens,
Pia tu desolatarum
Mentium universarum

Solatrix sis eminens.

5. Opus matrum ac nuptarum
Iubilando praeamarum

Mitis virgo permanens,
Taetrum chaos tenebrarum
Iubare precum sanctarum

Obstrue me muniens.

6. Nutris lacte mamillarum,
Quem nec caeli nec terrarum

Capiat vis fugiens,
Ergo me, flos feminarum,
Iunge illi, ne vel parum

Laedat leo rugiens.

7. Mediatrix animarum

Gerens zelum mundanarum

Christo eras uniens,
Aestum virtutum primarum
Pie mihi redona, rum-
pens scelus impediens.
8. Murus es contra ferarum
Dicta ictus bellicarum,

Tuos semper protegens,
Iuva, decus puellarum,
Ne ad ima me fossarum
Serpens trahat saeviens.

9. Evae matris tu vincla rum-
pis, dum proba feminarum

Despicis parturiens,
Da, ne pars fiam praedarum,
Quas attraxit sirenarum

Cantilena tinniens.

10. Regem regis hunc tuarum
Ubertate gratiarum,

Qui vana est corrigens
Et me caput plurimarum
Urbium, parochiarum

Regem sanctum faciens.

11. Te laudat hierarchiarum
Coetus, ut comes earum

Sim, tu fac compatiens,
Abice ab hoc saevarum
Templo morsus bestiarum,

Et regat vir oriens.
Mihi da, ut hunc praeclarum
Die zeli nec amarum

Videam et moriens.