119. De leata Maria V.

1. O regina virginum,
Labe carens criminum,

Domina caelorum,
Salve, lumen luminum,
Gignens numen numinum

Deumque deorum ;
Sicut sine seminum
Iactu tellus germinum

Parens est, flos florum,
Sic naturam hominum
Vincens paris Dominum

Praeter viri thorum.
2, Prima mater flentium,
Eva mortis taedium

Posteris legavit,
Sed Maria gaudium
Et vitae remedium

Cunctis reportavit;

Salutis excidium,
Mortis stillicidium

Serpens propinavit,
Evae dans consilium,
Quod Mariae studium

Prudenter calcavit.
3. Iahel fortitudine,
Rachel pulchritudine,

Fructu gaudet Lia,
Debora regimine,
Noemi cognomine,

Alda prophetia ;
Te illustres dominae,
Te insignes feminae

Figurant, Maria,
In caelesti agmine
Summo fulgens ordine

Caeli hierarchia.

4. Sara parit vetula
Filium anicula,

Risus suscitatur,
Deum profert parvula
Etenim iuvencula,

Mundus collaetatur;
A Rebecca sedula
Sub hoedi pellicula

Iacob palliatur,
Deus in puellula,
Scirpea fiscellula

Moyses celatur.

5. Rachel telam texuit,
De qua Ioseph induit

Tunicam talarem,
Quam fratrum, quos habuit,
Patri fraus exhibuit

Ut occisi parem;

Sic Maria praebuit
Carnem, in qua latuit

Deus, puellarem,
Ex qua mori statuit,
Qui mori non potuit,

O rem singularem.

6. Ergo, mater gratiae,
Pons misericordiae,

Dulcis spes reorum,
Laxa venas veniae,
Viscera clementiae,

Memor filiorum,
Iure matris regiae
Iube regem gloriae,

Ne memor malorum
Nos damnet, sed curiae
Post finem miseriae

Iungat beatorum.