123. De beata Maria V.

O veneranda Dei mater benedictaque virgo,
Salve millesies, pulcherrima nympha Maria,
Te laudo semper, te glorifico, benedico;
Ego non sum dignus sed me dignifica, digna.
5. O dulcissima mater et optima virgula Iesse,
Tu Davidis funda, rosa, vellus Gedeonis,
Inspice me, tunc noscam te, matrona beata,
Diligo te, non spernas me, fateor male facta.
Vae mihi, si spernis peccatorem, pia mater,

10. En, in te credo, contritam corde tuere.

Te scio tam mitem, nullum spernis miserando,
Offendi natum, iuste damnatus ut essem,
Tu nisi pro servo rogitares, virgo benigna.
Grates aeternas tibi reddo, tis quoque nato,

15. Nam bona multa facis mihi, fecisti faciesque.
Me tibi do totum, quidquid vis, da, pia, dulcis,
Te venerans, [tuum] natum quoque, sic ero salvus.
Virtutesque tuas mihi posco, dirige mores,
Vitam sanctifica, me vivifica, mala pelle.

20. Spernere da vitia, veracem da mihi linguam,
Ut semper crescam, non decrescam, rege vitam.
Iam tibi commendo, sponsa Christi, simul omnes
Viventes iustos simul iniustosque sepultos.
O pia, dignare pro cunctis efflagitare,

25. Cunctorum mater fidorum sis et amatrix.
Vellem, quod cuncti salvarentur prece matris,
Ut omnes Dominum laudare polo mereamur,
Qui tam magna dedit, quia plasmavitque redemit.
Gaude semper, ave, fiat mihi, quod rogitavi.

30. Ista pater praestet natus, sacrum quoque flamen,
Trinus et unus, huic laus sit, gloria, decus.