126. De beata Maria V.

1. Pater ymon, a quo mundus
lege firma regitur,

A quo certa ratione
benigne disponitur,

Parce plebi, quae a Christo
christiana dicitur.

2. Adonai, ab inferni

defende periculo,
Quos dilecti sacravisti

filii vocabulo,
Quos eiusdem redemisti

salubri patibulo.

3. Fili Dei, Iesu Christe,
dominator domine,
Qui pro mundi medicina

natus es de virgine,
Placa patri nos, quos tuo
redemisti sanguine.

4. Athanatos mediator
Dei atque hominum,

Firma pactum pacis huius
inter nos et Dominum,

Ne privemur regno Dei
pro commisso criminum.

5. Qui procedis ab utroque,

paraclite spiritus,
Cuius ignis inflammavit

fideles divinitus,
Hoc eodem nostras sordes

igne crema stirpitus.

6. Hoc eodem mentis nostrae

oculos illumina,
Hoc eodem sensus nostros

scabrosos examina,
Hoc eodem veternosa

nostra dele crimina.

7. Trinus Deus in personis,
unus in substantia,
Culpas nostras et reatus

plena dele venia
Et sic mundos a peccatis
reduc ad caelestia.

8. Ave, virgo Dei mater,
vera spes fidelium,
Porta caeli, stella maris,

recti cursus bravium,
Summa legis, forma pacis,
salutis exordium.

9. Ave, virgo, ave, feta,

ave, plena gratia,
Ave, sponsa, ave mater,

ave, Dei filia,
Quam diversa facis unum,

o omnipotentia!

10. Fons signatus, sacramenti
summi conceptaculum,

Scala Iacob, domus David,
Salomonis ferculum,

A leonis ore salva
christianum populum.

11. Theotocos, virga Iesse,

oliva fructifera,
Templum Dei, arca Noe,

columba pacifera,
Ab inferni nos Charybdi

in aeternum libera.

12. Turris, a quo pendet omnis

armatura fortium,
Rosa florens, sacra vitis,

lilium convallium,
Medicina peccatorum,

virtutis donarium.

13. Uva dulcis, flos suavis,

nardus odorifera,
Virgo semper gloriosa,

sublimis puerpera,
Praebe nobis adoptivis

pietatis ubera.
14. Orientis porta clausa,

quam vidit Ezechiel,
Mensa regis, ad quam dapes

tulit ipse Gabriel,
Quarum opem in leonum

lacu sensit Daniel.
15. Tu sigillum libri vitae

solidum in saecula,
Cuius potest solus agnus

solvere signacula,
In hoc nostra precum stilo

conscribe vocabula.

16. Tuae, virgo, sanctitatis

luce nos irradia
Et sic tua pia prece

Deo reconcilia,
Ut per mortem gloriemur

in caelesti patria.
17. Ad haec omnes potestates

virtutum caelestium,
Ad hoc, omnes sancti, vestrum

petimus auxilium,
Ut pars nostra sit vobiscum

in terra viventium.
18. Miserere nostri, Deus,

in personis trinitas,
Miserere, miserere

nostri, simplex unitas,
Te spiritus omnis laudet,

sempiterna deitas.