130. De beata Maria V.

1. Rex Christe clementissime,
Tu corda nostra posside,
Ut tibi laudes debitas
Reddamus omni tempore.

2. Memento, salutis auctor,
Quod nostri quondam corporis
Ex illibata virgine
Nascendo formam sumpseris.

3. Maria, mater gratiae,
Mater misericordiae,
Tibi devotos protege
Mores et vitam corrige.

4. Nos peccatores adiuva
Prece tua continua,
Ut, quidquid mali fecimus,
Tuus remittat filius.

5. Maria, mater gratiae,
Mater misericordiae,
Tu nos ab hoste protege
Et hora mortis suscipe.

6. Maria, mater Domini,
Sacrarium paracliti,
Virgo, regina virginum,
Pro nobis ora Dominum.

7. Maria, mater Domini,
Aeterni patris filii,
Fer opem nobis omnibus
Ad te confugientibus.

8. Per tuum, virgo, filium,.
Per patrem et paraclitum
Assis, parens, ad obitum
Nostrumque muni exitum.

9. Gloria tibi, Domine,
Qui natus es de virgine,
Cum patre et sancto spiritu
In sempiterna saecula.