131. De beata Maria V.

1. Salve, cella castitatis,
Salve, plena gratia,
Salve, templum deitatis,
Salve, solis regula.

2. Salve, portus naufragantis,
Salve, Iesse virgula,
Salve, splendor bonitatis,
Paradisi ianua.
3. Salve, fons sinceritatis,
Lux lucens in tenebris,
Salve, stella claritatis,
Luna sine nebulis.
4. Salve, decus sanctitatis,
Virgo venerabilis,
Salve, nympha venustatis,
Honor nostri generis.

5. Salve, lampas, lux caelorum,
Laus et decus martyrum,
Thesaurus apostolorum,
Spes communis omnium.

6. Tu flos florum, fons hortorum,
Lavans sordes criminum,
Pax et honor confessorum,
Pulchritudo virginum.
7. Tu sis servis adiuvamen,
Nutrix in periculis,
Tu es lapsis relevamen,
Medicamen languidis.
8. Maestis dulce confortamen,
Pia mater orphanis,
Mater Christi, virgo tamen,
Nulla tibi similis.
9. Salutata sic fuisti:
Ave, plena gratia;
Verbo carnem concepisti,
Virgo viri nescia.
10. Christum Iesum genuisti,
Qui salvavit omnia,
Et post partum permansisti
Virgo semper integra.

Salve dicant omnia.