152. Oratio ad beatam Mariam V.

Salve, stella maris, quae sola Maria vocaris,
Virgo regalis, amica Dei specialis,
Ianua salutis, nostrae tutela salutis,
Porta pia caeli, prompte succurre fideli.
5. Tu spes lapsorum, tu confugium miserorum,
Ad te suspiro, tua dona, beata, requiro.
Tu me salvifica, Christi specialis amica,
Cum prece devota famulantum suscipe vota.
O veneranda satis, mater summae pietatis,
10. O radix Iesse, fac me, quaeso, precor, esse
Ante tuum natum, sanctissima, funde precatum,
Ut me damnatum revoces delendo reatum.

Flos reginarum, paradisus deliciarum,
Sanctior es sanctis, genetrix electa tonantis,

15. Rivus aquae vivae, dulcedo virentis olivae,

Intemerata rosa, super omne, quod est, speciosa.
Stella solaris, pereo, nisi me tuearis,
Novi, quod de te veteres scripsere prophetae,
Et scio completa, quae dixit quisque propheta.

20. In regno Christi laetaris, quae genuisti,

Hunc petendo fidem servus precatur et idem,
Suscipe de caelis, per te rogat iste fidelis,
Ut mihi iam laeso prosit tua gratia, quaeso.
Mundi salvatrix, esto pro me mediatrix,

25. Filia Ierusalem, fac ante Deum venialem.
Nam veniam spero tuaque suffragia quaero,
Culpamque ploro, tu parce, flebilis oro.
Confidens rogo te, faciat Deus omnia per te,
Hunc interpella, mater simul atque puella,

30. Virgo tuam prolem, sidus complectere solem
Et per eum solem peccati dilue molem,
Molem peccati pergrandis, inveterati,
Quod quamvis fero, per te jdeponere quaero.
Spem sumo divinam, medicum simul et medicinam,

35. Meque reconcilia, sanctissima virgo Maria,
Ut benedicatur largitio, cui famulatur
Pontus, terra, polus, regnans per omnia solus.
O florens rosa, mater Domini speciosa,
O virgo mitis, o fecundissima vitis,

40. Clarior aurora, pro nobis omnibus ora,
Ora tu, pia, pro me, rosa, virgo Maria.