167. De beata Maria V.

1. Summi regis

mater et filia,
Tuo vincens
candore lilia,

Infinita

plaudens laetltia,
Te caelestis

honorat curia.

2. Decorata

caelesti solio,
Tu quae regnas
una cum filio,
Ante cuius

conspectum venio,
Tuo fidens
in patrocinio.

3. Te scripturae

loquuntur veterum,
Per te venit

formator siderum,
Per te mundus

excepit puerum,
Iugum legis

qui solvit asperum.

4. Per te, mundi

totius domina,
Peccatorum

solvantur crimina,
Et per tua

nobis munimina
Babylonis

siccantur flumina.

5. Tribus Iudae

propago nobilis,
Universo

mundo laudabilis,
Porta Sion

inexpugnabilis,
Peccatorum

prece flexibilis.

6. In te sperant

etiam miseri,
Qui pro culpis

merentur conteri,
Et erepti

de fauce inferi
Natum tuum

sequuntur liberi.

7. Fons hortorum,
aquarum puteus,
Via lucis,

splendor sidereus,

Te conventus
laudat aethereus,

Et formidat

princeps tartareus.

8. Dei templum,

regalis civitas,
Quam fundavit

ipsa divinitas,
De hac terra

orta est veritas,
Ut nos poenas

vitemus debitas.

9. Portam clausam

vidit Ezechiel,
Per quam solus

transit Emanuel,
Haec te signat,

salvatrix Israel,
Quam intactam

salutat Gabriel.

10. Quam caelestis

salutat vernula,
Prophetarum

canunt oracula,
Ipsam nostra

mirantur saecula,
Et est nobis

vivendi regula.

11. Stella maris,

sic enim diceris,
Ad te clamo,

ne me reliqueris,
Ad hoc enim

electa crederis,
Ut salutem

reportes miseris.

12. Per te summum

Dei consilium
Visitavit

nostrum exsilium,
Benedicta,

quae tale gaudium
Protulisti

votis fidelium.

13. Adam enim

humano generi
Protulisti

novum pro veteri,
Cuius per te

conformes fieri
Deprecantur

senes et pueri.

14. Per te, maris

stella clarissima,
Renovatur

peccatrix anima,
Per te Deus

revisit infima,
Et est drachma

reperta decima.

15. Contrivisti

caput vipereum,
Quod observat

tuum calcaneum,
Contra cuius

morsum funereum
Contemplamur

serpentem aeneum.

16. Tu velamen

legis in litera
Removisti,

virgo puerpera,
Ex te venit

lux salutifera
Per quam patet

legalis litera.

17. In te finit

figurae caecitas,
Et iam patet

scripturae veritas,
Per te nostra

scandit humilitas
Paradisi

sedes prohibitas.

18. Ergo, caeli

terraeque domina,
Quam sanctorum
collaudant agmina,

Benedicta

plus omni femina,
Meam, quaeso,

mentem illumina.

19. Esto mihi

in adiutorium
Tuum illum

orando filium,
Qui per ligni

vitalis pretium
Captivavit

hostem Aegyptium.

20. Tu propago

regalis germinis
Et humanae

decus originis,
In qua lumen

aeterni luminis
Verum corpus

vestivit hominis.

21. Et processit

admirabiliter
Verus Deus

et homo pariter,
In quem, virgo,

credo fideliter,
Ipsum pro me

precare iugiter.

22. Botrus Cypri,

rosa de Iericho,
Nardo compar

et malo punico,
Praesignata

cantu prophetico,
Me defende,

qui tibi supplico.

23. Me adligant

peccata grandia,
Et sum per me

indignus venia,
Tuo tamen,

quae potes omnia,
Interventu

me reconcilia.

24. In te omnes

abundant gratiae,
In te mihi

spes est laetitiae,
Cum sis mater

misericordiae,
Non fraudabor

a dono veniae.

25. Cum electos

omnes considero,
Ex his tibi

nullum aequipero,
Sol de cuius

processit utero,
Sana vulnus,

quod in me tolero.

26. Quae fovisti

corpus dominicum,
Excludendo

ritum Iudaicum
Ego talem

cum quaero medicum,
Consolamen

quaero non modicum.

27. Felix mater,

regina saeculi,
Spes salutis

fidelis populi,
Ad te mei

levantur oculi,
Tui preces

admitte famuli.

28. Educ vinctum

de mortis carcere,
Quem fatigat

hostis a latere,
Ipsum, virgo

beata, contere
Et me tuo

conserva munere.

29. Illud mihi

confer auxilium,
Quod molimen

evertat impium,
Ne ad meum

hostis excidium
Sibi ullum

reportet gaudium.

30. Ipse, cuius

omnipotentia
Te providit

ad caeli gaudia,
Infinita

sua clementia
Per te mihi

det vitae praemia.