174. De beata Maria V.

la. Vale, regina caelorum,
Ave, decus angelorum,
Salve, gaudium sanctorum,
Vale, solis regia;

1b. Vale, virgo, fons hortorum,
Servans virginale thorum,
Ave, scala peccatorum,
Via caeli regia.

2 a. Vale summa spes post Deum,
Qui sic deliquit in eum,
Quae Theophilum tam reum
Reformasti gloriae;

2 b. Vale, virgo, novum mirum,
Quae claudentem caeli gyrum
Mulier circumdas virum
Aeternae memoriae.

3 a. Vale, mater Iesu Christi,
Ave, quia tu fuisti
Sola digna, suscepisti
Ave Gabrielis ore;

3b. Vale, quia credidisti,
Ave, quia concepisti,
Gaude, quia peperisti,
Salve, mater novo more.

4 a. Vale, mater expers maris,
Ave, virtutum doctrina,

Porta caeli, portus maris,
Porta, via, medicina,

Potum vitae salutaris
Sitientibus propina.

4 b. Vale, de qua flos virtutis,
Procreatrix tu divina,

Confer opem destitutis
Et in hora vespertina

Sis nobis porta salutis,
Liberans a morte trina.