180. Ad beatam Mariam V.

1. Vale, virgo, post genitum,
Exaudi preces supplicum,
Ecquid poscenti Dominus
Tibi negabit filius?

2. Si tantum velis, domina,
Nostra delentur crimina,
Quapropter te praecipue
Oramus, servos respice.

3. Te orante, sanctissima,
Orant sanctorum agmina,
Si te adversam praevident,
Caelestes cives conticent.

4. Per te, virgo castissima,
Nobis donetur venia
Tuisque sanctis precibus
Concilietur Dominus.

5. Exaudi, virgo virginum,
Pro nobis ora filium,
Futura mala prohibe
Et miseris compatere.

6. O virgo, mater Domini,
Attende vocem populi,
Ut pro cleri criminibus
Ignoscens parcat Dominus.

7. Virgo gloriosissima,
Vota comple feminea
Nosque post vitam fragilem
Ad veram perduc requiem.