EXPOSITIO TEXTUS.

Et quia iste liber scriptus fuit in modum epistolae ad Timotheum, sicut et Caelestis hierarchia, praemittitur salutatio talis : Dionysius, quod est proprium nomen Auctoris, Presbyter, id est senior, hoc est, Episcopus, in quo tangitur ejus dignitas, fuit enim. Episcopus Athenarum, mittit salutem, vel hoc opus, Timotheo, qui fuit discipulus Pauli, compresbytero, id est, coepiscopo sibi, etenim ipse fuit Episcopus Ephesi.

Quidem, id est, certe, quia hierarchia, id est, sacer principatus, puerorum, id est, ministrorum, secundum morem sacrae Scripturae, ut Joan.XXI, 5: Pueri numquid pulmentarium habetis, etc, divinorum per participationem sacrorum donorum quae est, secundum nos, id est, apud nos, ad divinam, angelicam hierarchiam dico, intenta sacratissime, quantum ad rectam intentionem eorum quae sunt in ea, tendentem in Deum, ut in finem omnis actionis hierarchiae : atque divina, quantum ad dona quibus in hierarchia constituuntur, quae sunt Dei similitudines : quia, inquam, haec hierarchia, habetur ex deifica, Deum simulante, scientia, quantum ad perfectionem contemplationis, et ex operatione, quantum ad perfectionem activae : et haec duo ponebantur in diffinitione hierarchiae, quasi materialia, in cap. III Caelestis hierarchiae. Et ex consummatione, id est,

perfectione, quae est finis operationis hierarchiae : et ideo intermittit alia duo, scilicet purgationem et illuminationem : quia, inquam, sic habentur, oportet ostendere telelen, id est, ritum et formam mysteriorum,. id est, occultorum sacrae perfectionis, id est, ea quae latent sensibus velata in ritu perfectionis hierarchiae : oportet dico ostendere ex eloquiis sacrae Scripturae scilicet supermundanis , quia per inspirationem traditis, elevantibus intellectum super mundanas rationes, et sacratissimis, quantum ad ea quae in eis traduntur: et haec oportet ostendere his auditoribus, qui sunt perfecti ex hierarchicis sacramentis et traditionibus, id est, doctrinis, ut principia et auditores proportionentur rei traditae. Alia littera est, " habet, " ubi ista habetur, et potest sic legi : quia hierarchia habet tamquam essentialia sibi intenta, id est, actiones intentas, sacratissime atque divina dona, vel actiones, dico, ex deifica, etc.

Sed tu, o Timothee, vide, id est, cave, quomodo, id est, per quem modum sit hierarchia, ut ex principio, id est, ex quo principio sit, quia ex Deo : deinde considerata sanctitate principis, revenerare, id est, iterum atque iterum revenereris sancta sanctorum, id est, sancta mysteria hierarchiae, a sancto sanctorum tradita : et rationem sive modum reverentiae explicat communiter dicens : Sed autem et haec, scilicet sacramentum, quod est secreti Dei, hoc est, occulti nobis, quia lucem habitat inaccessibilem, ejus scilicet auctoris, honorifica hos ritus, scientiis intellectualibus et invisibilibus exteriori visu, id est, non sistendo in sensibilibus, sed procedendo exilis in insensibilia : in his enim honorantur,quod talium signa creduntur, et non proptersensibilia tantum. Honorifica, dico, conservans quidem haec imparticipata ab imperfectis, id est, immundis, quorum voluntas renititur, et incontaminata ab iis qui nituntur eis obviare, secundum quod di- citur, Matth. vii, 6 : Nolite dare sanctum canibus, neque mittatis margaritas vestras ante porcos, etc.: autem,id est,sed, communicans solis sacris auditoribus ea cum sacra illuminatione, id est doctrina sacrorum, id est, de sacris, sancte, quantum ad affectum, et pulchre, quantum ad intellectum, id est, per decentes rationes.

Autem, id est, sed vide quomodo non ex principio, id est, extra principii decentiam, quod est Deus, tradas ea. Si sancta sanctorum sunt, venerare ea. Si autem haec sunt ea quae sunt secreti Dei, etc. Et hic sensus ostenditur ex alia translatione, quae sic dicit : " Sed vide ut non extra terminum " suum mittas sancta sanctorum : reve-" neraberis autem, et ea quae sunt occulti " Dei, intellectualibus et invisibilibus " cognitionibus honorabis : extra termi-" num suum ponerentur, si non in in-" telligibilia reducerentur, et si immun-" dis communicarentur. "