DUBIUM.

1. Sed videtur, quod inconvenienter assignet illam theoriam : odor enim balfami, ut dictum est, significat aliquid existens in nobis quantum ad famam, vel conscientiam : ergo non debuit dicere quod symbolice per talem comparationem Jesus describitur.

2. Praeterea, Siccum evaporatum non nutrit : in tali autem sicco est odor, quia in fumali evaporatione, ut dicitur in libro de Sensu et sensato : ergo odori non convenit nutrire : et ita nec in Christo est proportio ad odores.

3. Praeterea, Corpus Christi est glorificatum : in talibus autem corporibus non potest esse vapor resolutus, sicut nec in incorporalibus : ergo non videtur,

quod declaret divinos vapores per immissionem gratiarum.

4. Praeterea, In quolibet corpore odorifero oportet esse calidum actu agens in siccum et humidum : ubi autem est talis actio corporea, ibi est corporale : ergo cura corpus Christi sit incorporale, non videtur quod competat sibi esse fontem diffusivum odoris.

5. Praeterea, Omnis satietas est ex impletione : impletio autem facit fastidium, quia abscindit desiderium : cum igitur in divina participatione non sit fastidium, quia dicitur, Eccli. XXIV, 29 : Qui edunt me, adhuc esurient, non videtur congrue dictum, quod divinae distributiones impleant, vel satietatem aut saturitatem faciant.

Solutio. Dicendum ad primum, quod ipse non intendit hic exponere moraliter, sed anagogice : et ideo reducit in summum in quod reduci potest, quod est Dominus Jesus Christus : cui competit balsamum propter naturam divinam, quae est principium incorruptionis et totius spiritualis odoris, et objectum secundum humanam naturam, per quam liniti sumus sacramentis ex passione Christi virtutem habentibus.

Ad secundum dicendum, quod in nutrimento est conversio cibi in nutritum, et secundum hoc ex odore non transumitur nutritio in spiritualia, hoc enim est materiale in nutrimento, sed delectatio quae est in eo ex conjunctione convenientis in illo est quid formale : et secundum hoc transfertur in divina per similitudinem odorum, quia sic odor corporalis etiam nutrit, et multo magis spiritualis, in quo est summa quies et delectatio .

Ad tertium dicendum, quod in sensibilibus est considerare naturae actionem, sicut quod sonus per commotionem aeris scindit lignum. Est et in eis considerare actionem animae, quae est in recipiendo intentionem sensibilis secundum quod sensibile habet esse corporale in re, et spirituale in sensu, sicut dicit Commentator. Quantum ergo ad actionem naturae, non est odor in corpore glorificato, scilicet per evaporationem, vel transmutationem, sed tantum quantum ad actionem animae : et sic non oportet in eis esse calidum agens, vel vaporem, nisi vapor dicatur ipsa odoris intentio. Et similiter dicendum ad quartum.

Ad quintum dicendum, quod saturitas salvatur quantum ad quietem quae est in objecto, quia non quaerit aliquid aliud: non tamen quantum ad impletionem recipientis, quia quanto plus percipit intellectus spiritualia, tanto magis augetur capacitas ejus : et sic numquam sequitur fastidium, sed semper manet desiderium.

8