BALTH. CORDERII, S. J. INTERPRETATIO.

Ubi ergo illa quae res quasque sacras complectitur hymnorum modulatio animae nostrae affectiones, et ea sacra quae paulo post celebranda sunt, rite disposuit, divinorumque carminum concentu cum ad res divinas, tum ad semetipsas mutuamque consensionem, ceu unica concordique chorea sacrorum coaptavit, ea quae in spiritali Psalmorum modulatione concisa sunt et magis obumbrata, per plures et manifestiores figuras atque explicationes sacratissimis scripturisticarum compositionum lectionibus dilatantur. In his sacrarum rerum contemplator uniformem quamdam atque singularem advertet conspirationem, utpote ab uno eodemque Dei principali spiritu concitatam ; unde jure merito in orbe post antiquiorem illam traditionem, Testamentum novum promulgatur, divino scilicet hierarchicoque ordine, mea quidem sententia, per hoc declarante, uti Vetus Testamentum futura praedixerit, Novum vero ipsamet divina Jesu opera exhibuerit ; atque illud quidem quasi quibusdam imaginibus depinxerit veritatem, hoc vero praesentem de-