EXPOSITIO TEXTUS.

A. Nobis vero, etc.

Hic ostendit exitum Ecclesiasticae hierarchiae a suo principio. Et primo ostendit modum exitus. Secundo, manifestat quod dixerat, ibi (sig. 9, B), Essentia enim nostrae, etc.

Littera sic exponitur : Sic dantur Angelis hierarchica : vero, pro sed illud quod donatur illis, scilicet Angelis, uniformiter, quia non per diversa signa, et connexim, id est, simpliciter, quia non per materialia et composita dona, tamen donatum est nobis, quantum possibile est nobis, ex eloquiis traditis a Deo, scilicet sacra Scriptura, in. varietate, quantum ad differentias significandi, et multitudine, quantum ad diversas causas sacramentorum separabilium, quia in eis sistere non debemus, sed separati ab eis per haec venire in intellectualia symbolorum, id est, sensibilium signorum.

Essentia enim, etc. Hic manifestat quid sit nobis donatum per symbola, per hoc quod causa nostrae hierarchiae sunt sacra eloquia, quae symbolis nobis tradita sunt. Primo ergo ostendit quo- modo nostra hierarchia perficitur per sacra eloquia, et a quibus sit tradita. Secundo, quod sunt per symbola tradita, ibi (sig. 9), Neque haec divini etc. Tertio, quibus haec symbola sint revelanda et quibus non, ibi (sig. 10), Revelandae tamen sunt, etc.