DUBIUM.

i. Sed videtur, quod non sit aeque potens haec operatio communioni : quia in communione continetur totus Christus, in hoc autem aliqua gratia tantum : ergo non est aeque potens ei.

2. Praeterea, Supra dictum est, quod propter sui dignitatem communionis operatio debet omnibus praeponi : si igitur haec operatio esset aeque potens illi, non debet poni post illam.

3. Praeterea, Hic nullum effectum Chrismatis dicit : ergo videtur, quod haec pars inconvenienter intelligitur de perficiendis, id est, de efficiendis in myro.

4. Praeterea, Quaeritur quare in hoc sacramento confirmationis natura non administret sufficientem materiam, sed oportet ut prius benedicatur per Episcopum, quia aliter de olei et balsami mixtione non posset fieri confirmatio, nisi prius esset benedicta : cum in baptismo et Eucharistia natura praeparet materiam propinquam : non enim oportet ut aqua in qua fit baptismus, primo consecretur quantum ad necessitatem sacramenti, et si fiat, ad quamdam solemnitatem pertinet : similiter non oportet prius panem benedici quam consecretur in corpus Christi.

5. Item, Quaeritur quare non determinat de aliis unctionibus sacris, sicut de oleo sancto, et de oleo infirmorum.

Et dicendum ad primum, quod sacramentum Eucharistiae in se consideratum simpliciter nobilius est hoc sacramento : sed tamen secundum quid aequipotens est sibi, scilicet in comparatione ad finem : quia hoc etiam reducit In unum sicut et illud : et hoc videtur tangere in littera. Et per hoc patet solutio ad secundum.

Ad tertium dicendum, quod materia hujus sacramenti est prius consecrata : et ideo ex ipsa datur Intelligi spiritualis effectus, et hoc non in baptismo, cujus materia quantum ad necessitatem sacramenti non est consecrata. Vel dicendum, quod Chrismatis usus non est tantum in una operatione hierarchica, sed in pluribus, ut prius dictum est : et ideo non poterat sufficienter dici effectus Chrismatis in partibus ejus (quod infra in theoria faciet) cum in diversis operationibus diversos proprios effectus habeat. Sufficit autem hic dicere In communi effectum ejus, scilicet quod est aequipotens communioni in faciendo societatem ad unum.

Ad quartum dicendum, quod ad bene esse plura concurrunt quam ad esse : baptismus autem dat esse spirituale : et Ideo sufficit in eo materia secundum quod est praeparata a natura : et similiter de Eucharistia quae est spirituale nutrimentum, et sicut dicit Philosophus in secundo de Generatione, cc ex eisdem nutrimur et sumus. " Sed in hoc sacramento confertur nobis spirituale bene esse, et ideo exigit aliquid ultra materiam praeparatam a natura.

Ad quintum dicendum, quod non intendit in hoc libro agere de sacramentis, ut dictum est supra, nisi secundum quod cadunt in operationem hierarchicam scilicet ministrorum Ecclesiae : oleum autem sanctum et infirmorum consecrantur simul sub Chrismate et sub eodem ritu, et sic ea continet sicut principalius, quamvis quodlibet habeat aliquos speciales operationes : et ideo determinando de Chrismate, determinat de aliis duo-

bus.

2