B. DUBIA

1. Sed videtur insufficienter enarrare ea, ex quibus habetur hierarchia : sicut enim dicit Philosophus, " Ad virtutem " tria exiguntur, scilicet scire, et velle, " et indesinenter operari : " cum igitur omittat voluntatem, ponens scientiam et operationem, videtur insufficienter dicere.

2. Praeterea, Sicut dicit Philosophus,

" Velle magis essentiale est.virtuti quam " scire, quia primum confert ad virtu-" tem : " ergo potius debuit ponere voluntatem, quam scientiam.

3. Praeterea, Secundum voluntatem movemur : cum igitur sanctificatio sit ex merito, ponens ea quae pertinent ad sanctitatem hierarchiae, potius debuit ponere voluntatem quam scientiam.

Solutio. Dicimus, quod in sanctitate, quae est ex operatione nostra, principalior est voluntas quam scientia, cujus sanctitas est, quae est per virtutes : sed sanctificatio hierarchica non est ex operatione nostra, sed ex quibusdam operatis, in quibus operatur virtus divina : et ideo in hac significatione non est principalior voluntas. Et per hoc patet solutio ad objecta.

1. Item, Videtur falsum quod dicit hic, sacramenta conservanda esse imparticipata ab imperfectis. Magis enim indigentibus magis sunt communicanda : imperfecti autem magis indigent : ergo eis magis sunt communicanda.

2. Praeterea, In operatione virtutum largitatis, secundum Philosophum, est conferre ei qui non habet : sed imperfecti non habent sanctitatem,quae confertur per sacramenta : ergo in collatione sacramentorum, hoc est praecipue observandum, ut dentur imperfectis.

Ad oppositum est quod dicitur, Sap. I, 5 et 4 : Spiritus sanctus disciplinae effugiet fictum, multo magis malitiae malum : et in malevolam animam non introibit sapientia.

Solutio. Dicimus, quod sunt quidam imperfecti voluntate, et actu, quorum scilicet voluntas repugnat gratiae : et talibus non sunt conferenda sacramenta, quia et contemnerent, et effectum sacramentorum non obtinerent : sunt enim sacramenta quaedam medicamenta spiritualia : unde sicut corporalis medicina non producit effectum suum in corpore, nisi praeparato per actionem, ita etiam ubi repugnat voluntas, gratiae non possunt habere effectum. Sunt autem quidam iterum imperfecti, qui tamen faciunt quod in se est, praeparantes se ad gratiam : et talibus sunt conferenda sacramenta. Et per hoc patet solutio ad objecta.

2