DUBIUM.

1. Sed videtur, quod Christus non sit in pluribus symbolis : quod enim est in pluribus non modo secundum essentiam, sed etiam secundum esse, variatur in pluribus et secundum plura : sed Christus secundum suum esse est in omnibus symbolis : ergo videtur quod varietur secundum illa, quod est inconveniens.

2. Praeterea, Videtur quod non sit unum Sacramentum quod sumitur ab omnibus : " sacramentum enim est vi" sibile signum ", ut dicit Hugo de sancto Victore : sed species sensibiles sunt plures : ergo videtur quod sacramenta sint plura.

3. Praeterea, Quaeritur quare hoc sacramentum sumitur in duplici specie ?

Solutio. Dicendum ad primum, quod corpori Christi non convenit esse in pluribus sacramentaliter secundum unionem ad divinam naturam, neque in quantum est glorificatum, sed in quantum est cibus spiritualis : et ideo est in omnibus speciebus significantibus spiritualiter refectionem, ubicumque consecrentur, et est in omnibus secundum suum verum esse : non tamen oportet quod varietur secundum illa nisi esse suum esset esse illorum, sicut idem est esse universalis et particularis : hoc autem non est : et ideo esse in pluribus speciebus est unum simpliciter.

Ad secundum dicendum, quod est tantum unum sacramentum numero ultima

unitate ab eo quod est res et sacramentum, scilicet corpus Christi : et hoc est quod est sacramentum principaliter, et est visibile in aliis, scilicet speciebus, licet non in se, sicut etiam character : id autem quod est tantum res, est aliquid tantum sacramenti, tamen de essentia sacramenti : et similiter quod est sacramentum. tantum, est aliquid sacramenti, non tamen principale in sacramento : et ideo ex his non multiplicatur sacramentum.

Ad tertium dicendum, quod sacramentum hoc sumitur propter refectionem, et propter hoc est species panis : et iterum propter redemptionem quae est in sanguine Christi, et ideo est species vini.

Iterum,in refectione corporali sunt duo, scilicet cibus, et id quod ducit cibum per membra, et hoc est potus. Similiter Christus spiritualiter est cibus reiiciens, et distribuit etiam nutrimentum per corpus mysticum totum : et ideo debuit sumi sub speciebus cibi et potus.

1 1

Juxta hunc autem deiformem modum divinus summus sacerdos etsi unitam suae hierarchiae disciplinam deiformiter in subjectos deducit sacrorum aenigmatum pluralitatibus utens : sed iterum tamquam absolutus et minoribus immensurabilis in proprium principium indiminute restituitur, et in unum suum intellectualem faciens introitum, videt pure perfectorum uniformes rationes, in secunda humanae processionis summum, in prima diviniorem converisonem faciens.

Pari prorsus eoque deiformi modo divinus pontifex, etsi singularem divini principatus sui scientiam in subditos benevole derivet, dum aenigmatum sacrorum varietatibus utitur ; rursus tamen, ceu absolutus a rebus inferioribus ac liber, ad proprium principium suum integre revertitur, spiritalique suo in unum introitu perfecto, singulares istas sacramentorum rationes pura mente cernit, dum benigni humanique sui ad inferiora progressus finem diviniorem ad prima facit reversionem.

Psalmorum autem sacra oratio conveniens omnibus hierarchicis fere mysteriis, nonne futurum est explicari omnium summo sacerdotalissimo ? Omnis quidem enim sacra et agiographos deltos, aut ex Deo existentium generalem subsistentiam, aut dispositionem, aut legalem hierarchiam et conversationem, aut divini populi haereditatum distributiones, et habitationes, aut judicum sacrorum, aut regum sapientium, aut sacerdotum divinorum intelligentiam, aut veterum virorum in varietate et multitudine anxietatum immutabilem in patientia philosophiam, aut actionum sapientes synagogas, aut divinorum amorum cantica et divinas imagines, aut propheticas futurorum praedicationes aut viriles Jesu divinas actiones, aut ipsorum discipulorum Deo traditas, et Dei imitatorias conversationes, et sacras doctrinas, aut occultam et mysticam visionem ipsorum discipulorum dilectissimi, et divini ac mirabilis supermundanam Jesu theologiam ad deificationem opportunis narravit, et sacris teletarum deiformibus anagogis copradicavit.

Psalmorum porro sacra modulatio, quae mysteriis hierarchicis fere omnibus quasi substantialis conjungitur, ab omnium sanctissimo nequaquam erat divellenda ; omnis namque sacrae Scripturae textus vel conditam a Deo rerum substantiam ac dispositionem, vel legalem hierarchiam ac politiam, vel haereditatum divini populi distributiones ac possessiones, vel sacrorum judicum regumve sapientium atque sacerdotum divinorum prudentiam, vel priscorum virorum in tristium varietate ac multiplicitate casuum inconcussam tolerantiae philosophiam, aut sapientes rerum gerendarum praeceptiones, vel amorum cantica divinorum imaginesque divinas, vel praesagas futurorum praedictiones, vel viriles Jesu Dei operationes, ejusdemque discipulorum divinitus tradita et ad Deum imitandum conducentia vitae instituta doctrinasque sacras, arcanamve illam mysticamque visionem discipuli dilecti divinique, atque supermundialem Jesu theologiam iis qui divinitatis capaces sunt exposuit, sacrisque cum sacramentorum tum. ad Dei formam consequendam aptis institutionibus confirmavit.