EXPOSITIO TEXTUS.

Inde, aestimo, etc.

Ostendit quare singulariter dicatur teleta, id est, perfectio, cum omnes sint teletae hierarchicae actiones.

Dicit ergo, quod ideo teleta simpliciter dicta nominatur Chrisma, quia significat et repraesentat Christi perfectionem, quam habuit in utraque natura, quia fuit perfectus Deus et perfectus homo, sanctificatus in quantum homo, et sanctificans in quantum Deus, sicut Chrisma consecratur.et consecrat alia.

Deo, idest, a Deo.

Duces, id est, Apostoli, pudicissimum,

id. est, sanctissimum, sacrificium, id est, consecrationem, unguenti, id est, Chrismatis, nominant teletam absolute, id est, perfectionem, ex perfecto, quia teleta ex perfectione nomen habet, acluose, id est, efficaciter sive congrue : tamquam si quis dixerit Dei teletam, id est, ac si per hoc quod dicitur simpliciter teleta, esset quis significans perfectionem quae est in Christo, ipsi, scilicet duces laudantes divinam perfectam operationem ipsius, scilicet Chrismatis, utroque intellectu, id est, secundum quod intelligitur teleta simpliciter, et Dei teleta : vel ipsius, scilicet Christi, utroque intellectu, id. est, divino et humano.

Haec enim est hostia ipsius Christi, id est, talis oblatio competit sibi, scilicet sanctificari humanitus, id est, secundum naturam humanam propter nos assumptam, et deifice, id est, operatione divinae naturae perficere omnia, etc. Vel aliter, ipsius, scilicet Chrismatis est talis hostia, id est, talis oblationis modus, sanctificari, id est, consecrari, propter nos, id est, propter nostram sanctificationem, humanitus, id est, divina benignitate, et deifice, id est, secundum divinam virtutem operantem in ipso, perficere omnia, id est, alias teletas, etc.

18