DIVISIO ET EXPOSITIO TEXTUS.

A. Haec quidem divinissimi unguenti, etc.

Sicut dictum est prius, operatio hierarchiae Ecclesiasticae est aut circa progredientes, aut circa exeuntes.

Circa progredientes est duplex, aut quantum ad progressum in via, vel quantum ad terminum in quo consummatur progressus. Quia igitur determinavit de operatione hierarchiae, quae est circa ingredientes, scilicet de baptismo, et de his quae sunt juvativa secundum progressum in via, vel reficiendo, ut Eucharistia, vel tradendo vires contra impedimenta viae, sicut confirmatio Chrismatis, in parte ista incipit determinare de operibus hierarchicis quibus aliquis constituitur in aliquo gradu dignitatis super alios, quod est quasi ultimum et terminus in quo stat progressus hierarchicus.

Dividitur autem haec pars in duas partes. In prima determinat de dispositione Ecclesiasticae hierarchiae, dividendo eam

in suas partes. In secunda determinat specialiter de perfectionibus eorum qui in aliquo gradu Ecclesiasticae hierarchiae collocantur, ibi (g 11), Lex quidem haec est, etc.

Prima autem pars dividitur in partes tres. In prima continuat se ad. praecedentia dicens de quo est intentio. In secunda ponit ea in quibus universaliter consistit omnis hierarchia, ibi (sig. 2), Et omnis quidem hierarchiae, etc. In tertia subdividit ea in quibus nostra hierarchia consistit, ibi (g 6), Unaquaeque vero, etc.

Primo ergo dicit, quod dictis his quae pertinent ad Chrismatis operationem et aliorum, restat dicere de ordinibus, quibus sacra ministrantur, et de officiis eorum et operationibus, ut cognoscatur dispositio nostrae hierarchiae, quae inordinata distinguit, et ordinata replet secundum uniuscujusque analogiam.

Unguenti, id est, Chrismatis, operatio perfecta, quia secundum eam perficiuntur aliae teletae.

Actiones quae scilicet pertinent ad vitam ipsam, fortassis, quia aliter posset videri, quod deberet de aliis quae etiam pertinent ad progressum in via, determinare, sicut est paenitentia, de qua tamen non determinat, quia ejus ritus consistit potius in quibusdam operibus virtutum ex parte poenitentis, quam in ministris hierarchicis : et iterum non habet virtutem tantum ex operatione hierarchiae, quantum ex ipso poenitente : sed quantum pertinet ad operationem hierarchicorum prout poenitens absolvitur virtute clavium, determinabit de hoc cum ordinibus.

Sacerdotales, id est, sacra dantes per dispensationem sacramentorum, ordinationes, id est, ordinibus.

DUBTUM,

Sed videtur, quod insufficienter ibi determinet de ordinibus, eum sint septem, ipse autem determinat tantum de tribus, scilicet Episcopis, Presbyteris et Diaconis : cum tamen Episcopatus etiam non sit ordo, ut probatur in IV Sententiarum a Magistro .

Et dicendum, quod intentio sua est determinare tantum de ordinibus sacris, cum quibus in primitiva Ecclesia etiam inferiores ordines tradebantur propter paucitatem et idoneitatem ministrorum : in toto enim potestativo superius continet in se omnia inferiora. Nunc autem quia ministri non sunt ita idonei, oportet ut primo probentur inferioribus officiis, quam assumantur ad digniora. Et iterum quia Ecclesia multiplicata est, oportet ministros inferiores distinctos esse a superioribus : quia non sufficerent ad utrumque.